NASA zapuściła kaśmičny aparat da Jeŭropy, kab adšukać tam žyćcio
Kaśmičny aparat Europa Clipper, jaki palacić da spadarožnika Jupitera, byŭ zapuščany pry dapamozie rakiety-nośbita Falcon Heavy kampanii SpaceX.
Pra heta paviedamiła pres-słužba NASA.
Pusk zonda prajšoŭ ź placoŭki 39A Kaśmičnaha centra imia Kenedzi na mysie Kanavierał u Fłarydzie. Pieršapačatkova zapusk byŭ zapłanavany na 10 kastryčnika, adnak jaho pryjšłosia adkłaści z-za ŭrahana «Miłtan».
Dla vychadu na arbitu Jupitera ŭ krasaviku 2030 hoda aparatu treba budzie pieraadoleć kala 2,9 miljarda kiłamietraŭ. Navukovyja daśledavańni vakoł Jeŭropy kaśmičny aparat pačnie vykonvać u 2031 hodzie.
Zond zabiaśpiečany samym składanym naboram navukovych instrumientaŭ, jaki NASA kali-kolviek nakiroŭvała da Jupitera, u tym liku radarami, kamierami i pryborami dla vymiareńnia ciapła.
Try asnoŭnyja navukovyja mety Europa Clipper uklučajuć vyznačeńnie taŭščyni ledzianoj kary spadarožnika i daśledavańnie sastavu i hieałohii padlodnaha akijana.
Kali misija dakaža, što Jeŭropa prydatnaja dla žyćcia, heta moža paćvierdzić toje, što ŭ Soniečnaj sistemie i za jaje miežami isnuje bolš suśvietaŭ, prydatnych dla žyćcia, čym mierkavałasia raniej, havorycca ŭ paviedamleńni NASA.
Jeŭropa źjaŭlajecca šostym pa addalenaści spadarožnikam Jupitera i doŭhi čas ličyłasia adnym z najbolš prydatnych miescaŭ dla žyćcia ŭ Soniečnaj sistemie (nie ličačy Ziamli). Misija Juno ad NASA praviała jaje detalovaje daśledavańnie ŭpieršyniu ŭ historyi ŭ 2024 hodzie. Danyja misii Galileo pakazali, što pad ledzianoj pavierchniaj spadarožnika znachodzicca vada, abjom jakoj prykładna ŭdvaja pieravyšaje abjom ziamnych akijanaŭ.
Dno akijana na Jeŭropie pakryvaje hornyja parody, što spryjaje chimičnym reakcyjam i vypracoŭcy enierhii. Heta robić spadarožnik Jupitera klučavym kandydatam, kab adšukać pieršyja prykmiety žyćcia pa-za Ziamloj.
Kamientary