Tajvański napoj, jaki spačatku nie spadabaŭsia biełarusam, staŭ papularnym u nas praz 10 hadoŭ
Babłcišnyja pakrysie zachoplivajuć Minsk. Što ž heta za ekzatyčny napoj — babł-ci?
U asnovie Bubble tea (ci harbaty z burbałkami) — harbata (čornaja, zialonaja, ułun) i šaryki tapijoki. Voś tyja samyja šaryki-burbałki i jość hałoŭnaj fiškaj. Tapijoka — heta krupčasty kruchmalisty pradukt, jaki vyrablajuć z karanioŭ raśliny manijok. Jon vysokakałaryjny i lohka zasvajalny. Šaryki z tapijoki źniešnie nahadvajuć šaryki z žele.
Babł-ci byvaje małočnym (kali vykarystoŭvajecca zvyčajnaje ci biezłaktoznaje małako, viarški) i nie. Ciapier časta dadajuć roznyja siropy, kavałački sadaviny i navat robiać dla napoju «syrnuju nakryŭku» (heta ŭźbity małočna-śmietankovy krem, jaki kładuć źvierchu).
Babł-ci źjaviŭsia ŭ Tajvani ŭ 1980-ch hadach. Isnuje niekalki roznych viersij nakont taho, u jakim harbatnym pakoi ŭpieršyniu prydumali dadać da harbaty z małakom (a takaja moda pačałasia na vostravie jašče z časoŭ hałandskaj kałanizacyi ŭ 1624—1662 hadach) šaryki tapijoki.
Napoj staŭ karystacca šalonaj papularnaściu — spačatku na radzimie, a potym i za jaje miežami. U 1990-ja babł-ci hatavali ŭžo ŭ roznych krainach śvietu. Ale da Biełarusi moda dabirałasia doŭha.
Pieršyja miescy, dzie možna było pačastavacca babł-ci, adkrylisia ŭ nas kala dziesiaci hadoŭ tamu. Napoj spačatku źjaviŭsia ŭ sušy-barach «Manha», zatym u Bubble Maker u HC Galileo.
A ŭ 2015 hodzie nasuprać Nacyjanalnaha mastackaha muzieja adkryli Bubbles Bar, dzie babł-ci staŭ asnoŭnaj fiškaj. Tady dyrektar raskazvaŭ u intervju «Anłajnieru», što vybiraŭ miesca ŭ horadzie, dzie chodzić šmat zamiežnikaŭ. Jon mierkavaŭ, što dla biełarusaŭ pieršy čas novy napoj budzie nadta ekzatyčnym, tamu raźličvaŭ bolš na turystaŭ ź inšych krain.
Pratrymacca doŭha ŭ Bubbles Bar nie atrymałasia. Užo 1 studzienia 2016 hoda ŭ jaho sacsietkach paviedamili, što kafe bolš nie pracuje. Apiaredžvać modu nie zaŭsiody dobra.
Zdajecca, u 2024 hodzie biełarusy narešcie palubili smak babł-ci. Bo miescy, dzie pradajuć hety napoj, źjaŭlajucca jak hryby paśla daždžu. U śpisie fud-błohiera «Mierzkij Kokobaj» ciapier 22 varyjanty, i heta daloka nie kaniec. Navat źjaviłasia asobnaja nazva dla kafe, dzie hałoŭny napoj babł-ci — babłcišnaja. Pra toje, jakoj papularnaściu karystajecca napoj z Tajvania, śviedčyć toje, što za adzin dzień — 7 kastryčnika — u Minsku adkrylisia adrazu dźvie babłcišnych («Tapijoka» na Niamizie i «Pop ci» na vulicy Kisialova).
Što pa cenach? Naprykład, u Lotus Bubble za samy maleńki i tanny babł-ci treba zapłacić 5,5 rubla, ale chapaje varyjantaŭ i za 9-10 rubloŭ (u zaležnaści ad pamieru i składnikaŭ).
Ale daktary rajać usio ž nie złoŭžyvać modnaj harbataj. Za košt roznych dabavak babł-ci stanovicca ŭ razy mienš karysnym za zvyčajny čorny abo zialony čaj. Adznačajuć i vysokuju kałaryjnaść harbaty z burbałkami, jakaja źviazana z vysokaj kolkaściu vuhlavodaŭ u tapijocy, a taksama kałaryjnaściu siropaŭ.
Nihieryjski futbalist, jaki hulaje za «Ivacevičy», nabyŭ francuzskuju kaviarniu ŭ Breście
Kafe ŭ Mahilovie raskleiła niezvyčajnyja abjavy
Uładalnik «Pajedziem pajadzim» la Kurapataŭ adkryŭ novy restaran u Novaj Baravoj
Jakaja sietka kafe samaja raspaŭsiudžanaja ŭ Biełarusi? Heta nie «Burhier Kinh» i nie były «Makdonalds»
Ciapier čytajuć
Zatrymany eks-kiraŭnik RRB-Banka Vital Drankievič, u minułym sam śledčy1
Zatrymany eks-kiraŭnik RRB-Banka Vital Drankievič, u minułym sam śledčy
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary