U Dziaržaŭnym muziei Abchazii visić partret Šamila Basajeva. I zdymać jaho pakul admaŭlajucca
Na najaŭnaść partreta adnoj ź simvaličnych fihur kolišniaha čačenskaha supracivu Šamila Basajeva ŭ hałoŭnym abchazskim muziei źviarnuli ŭvahu rasijskija praŭładnyja telehram-kanały, palitołahi i aktyvisty i pačali skandał. Ambasada Rasii ŭ Abchazii nazvała demanstracyju partreta «niedapuščalnaj».
Šamil Basajeŭ u 1992 hodzie vajavaŭ z Hruzijaj na čale čačenskaha atrada na baku abchazskich sieparatystaŭ i za heta byŭ uznaharodžany vyšejšaj uznaharodaj Abchazii — miedalom «Hieroj Abchazii». U Abchazii jaho šanujuć dahetul.
Paśla taho, jak pačaŭsia skandał, dostup da ekspazicyi «Hieroi Abchazii» časova zakryli. Adnak uvohule jaho zdymać abchazy pakul admaŭlajucca.
Supracoŭniki muzieja ŭ kamientary «RIA Novosti» patłumačyli, što partret Šamila Basajeva visić u budynku muzieja z 2012 hoda. I administracyja nie budzie jaho prybirać datul, pakul nie budzie adpaviednaj pastanovy suda, abo pakul samoha Basajeva nie pazbaviać zvańnia hieroja Abchazii.
«U pieryjad Ajčynnaj vajny naroda Abchazii jon dapamoh nam atrymać pieramohu nad vojskam Dziaržaŭnaj rady Hruzii. Jon častka našaj historyi. My sami nie budziem zdymać jaho fota», — zajavili ŭ muziei.
Šamil Basajeŭ — adna z klučavych postaciaŭ čačenskaj vajny za niezaležnaść ad Rasii, jakaja adbyvałasia ŭ 1990-ja hady. Jon praciahvaŭ zmahańnie navat paśla taho, jak rasijskaj armii ŭdałosia ŭziać terytoryju Čačni pad kantrol, rasijskim śpiecsłužbam udałosia jaho zabić tolki 10 lipienia 2006 hoda. Da taho času jon ličyŭsia ŭ čačenskim supracivie fihuraj № 1.
Rasija dabivajecca, kab Abchazija dazvoliła masavaje pierasialeńnie tudy rasijan. Dla hetaha spyniła vypłatu zarobkaŭ abchazam
Hruzija maje namier da 2030 hoda viarnuć Abchaziju i Paŭdniovuju Asieciju i stać členam ES
Prezident samaabvieščanaj Abchazii zajaviŭ, što zacikaŭleny va ŭstupleńni ŭ Sajuznuju dziaržavu. Ale pry ŭmovie
Ciapier čytajuć
Zatrymali kiraŭnikoŭ ivent-kampanij. Adzin ź ich dapamahaŭ ładzić kancerty ŭ padtrymku Łukašenki14
Kamientary