Maskoŭski kiroŭca z «dziaviatkaj» na padroblenych biełaruskich numarach sprabavaŭ vydać siabie za biełaruskaha śpiecsłužbista
Na minułym tydni abmiarkoŭvałasia historyja maskviča, jaki raskatvaŭ pa Maskvie na Kia Mohave z padroblenymi biełaruskimi numarami Je 888 KCH-9. Jany kinulisia ŭ vočy błohieru praź nieisnujučy 9 rehijon, kiroŭcu zatrymali. Ale sens numaroŭ tonki.
Biełaruskija numary pačynajucca nie ź litary (kali heta nie elektramabil), a z čatyroch ličbaŭ. U hetym sensie na padroblenych numarach, ź jakimi złavili maskviča na KIA, usio niapravilna, a nie tolki rehijon (numary z «dziaviatkaj» vydavać jašče nie pačali).
Niaŭžo jon byŭ taki durny, što hetaha nie razumieŭ? Nie, naŭrad ci. Reč u inšym.
U hetych numarach jość utojeny ad masavaj publiki sens, jaki, u toj ža čas, vielmi prazrysty dla maskoŭskich daišnikaŭ.
Numary ŭzoru Je[***]KCH9[*] u Rasii ekskluziŭna vykarystoŭvajucca na słužbovych mašynach Centralnaha aparatu Fiederalnaj słužby achovy (FSA).
Funkcyi FSA možna hruba paraŭnać ź biełaruskaj słužbaj biaśpieki Łukašenki — achova vyšejšych adkaznych asob i stratehičnych abjektaŭ.
Rasijskija daišniki, biezumoŭna, viedajuć, chto jeździć na takich numarach, i, jak ličycca siarod abyvacielaŭ, nie spyniajuć navat pry parušeńniach. Praz heta źjaviŭsia navat narodny pierakład abrevijatury JEKCH — «jedu kak choču».
Takim čynam, načeplenyja na Kia padroblenyja biełaruskija numary mahli b dapamahčy syści za supracoŭnika biełaruskich śpiecsłužbaŭ.
Jość tonkaść i ŭ nieisnujučaj u biełaruskaj sistemie numaroŭ dziaviatcy. Maskoŭskija supracoŭniki FSA — horad, u jakim i jeździła KIA, — u asnoŭnym majuć sieryju numaroŭ, jakaja pačynajecca na 9 (u Maskvie heta 97 i 99, a taksama 90 — dadatkovy kod Maskoŭskaj vobłaści).
Numary pačynajucca ź litary Je.
Takim čynam, i pieršaja Je, i apošniaja dziaviatka na «biełaruskich» numarach Je888KCh-9, vierahodna, raźmieščany nie prosta tak, a dla ŭviadzieńnia ŭ zman miascovych daišnikaŭ, jakija ŭ ideale pavinny paličyć, što ŭ krainie vajennaha sajuźnika dziejničajuć takija ž niapisanyja numarnyja praviły, jak u ich doma.
Miarkujučy pa ŭsim, schiema pracavała.
Haspadara mašyny i numaroŭ zatrymali tolki paśla taho, jak pra situacyju stała viadoma publična. Jaho spynili na Jarasłaŭskaj šašy 4 kastryčnika.
Na 53‑hadovaha žychara Maskvy skłali niekalki pratakołaŭ. Padroblenyja rehistracyjnyja znaki kanfiskavali.
Ciapier čytajuć
Kryk dušy Žyhara pra hrupu Kavaleŭskaha: Hučać zajavy, što Łukašenka lehitymny prezident, choć i nie abrany demakratyčna49
Kamientary