Lesia Rudnik bolš nie dyrektarka Centra novych idej. Z arhanizacyi sychodzić Hienadź Koršunaŭ
Daviedalisia, što adbyvajecca.
Daśledčy Centr novych idej (CNI) sustrakaje Novy hod ź istotnymi źmienami: z pasady dyrektarki centra sychodzić Lesia Rudnik, ustanovu taksama pakidaje staršy daśledčyk, sacyjołah Hienadź Koršunaŭ.
«Novaha čałavieka na pasadzie dyrektara nie budzie»
U kamientary dla «Našaj Nivy» Lesia Rudnik raspaviała, što idzie z pasady dyrektarki centra i adychodzić ad apieracyjnaha kiravańnia ŭstanovaj. Pry hetym jana zastajecca ŭ składzie rady CNI, kudy, akramia jaje, uvachodziać Ryhor Astapienia i Anton Radniankoŭ.
«Takoje rašeńnie ja pryniała, bo chaču bolš času pryśviačać akademičnaj karjery ŭ Šviecyi. Paśla abarony svajoj doktarskaj i atrymańnia stupieni PhD pa palitałohii ŭ vieraśni 2025 ja vyrašyła ruchacca dalej pa akademičnym šlachu», — raskazvaje Lesia Rudnik.
Niadaŭna jana atrymała hrant ad Swedish Research Council dla praviadzieńnia ŭłasnaha daśledavańnia. Ciapier Lesia Rudnik budzie pracavać u Södertörn University (Šviecyja), a taksama častkova ŭ Maastricht University (Niderłandy).
«Moj prajekt staŭ adnym ź dzieviaci padtrymanych na ŭsiu Šviecyju ŭ sacyjalnych navukach. Budu zajmacca vyvučeńniem rehulavańnia Big Tech i AI u Jeŭrasajuzie i niekalkich aŭtarytarnych krainach», — dadała naša surazmoŭca.
Razam z tym historyja Lesi Rudnik z Centram novych idej nie zaviaršajecca. Jana budzie ŭdzielničać u stratehičnym raźvićci arhanizacyi, zastajecca kiraŭnicaj prajekta CNI women fellowship i pieryjadyčna budzie dałučacca da daśledčaj pracy kamandy. Kiravańnie CNI zaraz budzie adbyvacca pa krychu inšaj unutranaj schiemie, adnak novaha čałavieka na pasadu dyrektara nie pryznačać. Asnoŭnyja tvary centra ŭ bolšaści zastanucca tymi ž, niekalki novych ludziej stanuć bolš publičnymi.
«Za čas pracy ŭ CNI šmat čaho adbyłosia. Arhanizacyja ŭmacavałasia, stała bolšaj, my rabili i praciahniem rabić važnyja daśledavańni i adukacyjnyja prahramy. Ja asabista vielmi ciešusia tym, jak za apošni hod my naładzili arhanizacyjnyja pracesy, kulturu, uzmacnili daśledčuju etyku i raźvilisia jak kamanda akademična. Asabliva hanarusia i tym, što zapuścili žanočuju prahramu CNI Women fellowship.
Čas u CNI jak dyrektarki byŭ vielmi važny krok dla majho rostu, spadziajusia, i dla rostu arhanizacyi taksama. Ja ŭdziačna svaim kaleham za hetyja hady, za natchnieńnie i za toje, što byli vydatnaj kamandaj», — padsumavała Lesia Rudnik.
«Maju spadzieŭ, što toje nie kančatkovy vyrak»
Pra svajo zvalnieńnie z Centra novych idej paviedamiŭ u fejsbuku staršy daśledčyk ustanovy Hienadź Koršunaŭ, były dyrektar Instytuta sacyjałohii Akademii navuk Biełarusi.
«Voś i ciapier nadyšoŭ čas čarhovych karjernych źmien. Čas majho supracoŭnictva z Centram novych idej — doŭhi i vielmi plonny — pakul skončyŭsia. Ščyra dziakuju maim kaleham za supracu! Zdajecca, razam my zrabili šmat cikavych i karysnych prajektaŭ: pra kalektyŭnuju traŭmu, baromietr represij, biełaruskuju dyjasparu, indeks rezilijentnaści i šmat inšych», — napisaŭ sacyjołah.
U razmovie z «Našaj Nivaj» Hienadź Koršunaŭ udakładniŭ, što skončyŭsia prajekt, nad jakim ekśpiert pracavaŭ apošni hod, i razam ź im — etap jaho ščylnaj supracy ź CNI.
«Ale maju spadzieŭ, što toje nie kančatkovy vyrak i pry nahodzie ź CNI my jašče nie raz pasupracoŭničajem», — padkreśliŭ jon.
Centr novych idej — biełaruski niezaležny analityčny centr, jaki pracuje z 2012 hoda. Arhanizacyja była stvoranaja Ryhoram Astapieniam i Antonam Radniankovym jak placoŭka dla hłybokaha analizu hramadska-palityčnych pracesaŭ i asensavańnia mahčymych šlachoŭ raźvićcia Biełarusi.
Centr pracuje ŭ troch kirunkach: uciahvańnie hramadstva ŭ abmierkavańnie reformaŭ i publičnuju dyskusiju, praviadzieńnie niezaležnych daśledavańniaŭ, padtrymka i raźvićcio novych lidaraŭ.
U sakaviku 2025 hoda ŭłady Biełarusi abjavili Centr novych idej ekstremisckim farmiravańniem, a jaho internet-staronki — ekstremisckimi materyjałami.
«Naša Niva» — bastyjon biełaruščyny
PADTRYMAĆ
Kamientary
Ničoha sabie, taki hiendarny dysbałans siarod zasnavalnika? Kali Anton chacia b u svaim čacie składzie samakrytyku?