Vy dakładna ździviciesia: u Minsk chadziŭ aŭtobus z sapraŭdnymi łožkami dla pasažyraŭ
Vy dakładna nie viedali pra hety fakt: u Minsk i Homiel chadziŭ aŭtobus z łožkami. Tak, možna było vyspacca ležačy prosta na chadu! Takich aŭtobusaŭ u Biełarusi bolš nie zastałosia, ale ŭ krainach niepadalok usio jašče možna pajeździć, piša Blizko.by.
Minčanin Eryk pryhadaŭ taki fakt. Niedzie na pačatku dvuchtysiačnych jon zaŭvažyŭ u Minsku aŭtobus-«harmonik», maršrut jakoha lažaŭ niekudy na čarnamorskija kurorty. U piaredniaj častcy byli siadziačyja miescy, a ŭ zadniaj — spalnyja palicy.
Možna było kupić kvitok tolki na siadziačaje miesca, a možna było dapłacić — i tady ŭ dadatak da siadziačaha miesca atrymać jašče i lažačaje.
Hučyć fantastyčna. Tym nie mienš, žurnalisty zmahli daviedacca, što heta byŭ za aŭtobus, adkul jon uziaŭsia i kudy chadziŭ.
Heta aŭtobus małaviadomaj u nas češskaj marki Karosa (nie błytać ź vienhierskim Ikarus). Darečy, adzin aŭtobus-«harmonik» Karosa, ale inšaj madeli, nabyty dla ekśpierymientu, chadziŭ u Minsku na rehularnych maršrutach.
Dyk voś, aŭtobus z łožkami nazyvaŭsia Karosa C744 Hotel Bus. Sa zvyčajnaj «Karosy» jaho pierabudavała kampanija TICO Servis jašče ŭ 1992 hodzie pa zamovie biznesmiena z Čechii Miłana Bułvy i jahonaj firmy Bulva Service. Inžyniery prypadniali ŭ zadniaj častcy sałona dach na 60 santymietraŭ i ŭładkavali tam spalnuju zonu, a zaadno źmianili kanfihuracyju dźviarej. Aŭtobus tady mieŭ fijaletavy koler kuzava, potym jon staŭ žoŭta-zialonym.
U piaredniaj častcy było try dziasiatki zvyčajnych siadziačych miescaŭ: miakkich, adkidnych, z padłakotnikami i stolikami. Tut ža byŭ padviešany televizar ź videamahnitafonam — zabyty ciapier termin «videadvojka». U siaredniaj častcy raźmiaścili mini-kuchniu, prybiralniu, chaładzilnik i spalnaje miesca dla druhoha kiroŭcy.
A ŭ zadniaj — łožki dla pasažyraŭ u try jarusy. Pryčym z adnaho boku łožki byli dvuchspalnymi, ź inšaha — adnaspalnymi.
Vyhladali jany prykładna jak palicy ŭ płackartnych vahonach: adna nad adnoj, z draŭlanymi leśvičkami.
Kala kožnaha łožka było akno z fortkaj, palica-sietačka dla drobnych rečaŭ i štorka, jakaja dazvalała całkam adharadzicca ad sałona.
Usiaho atrymlivałasia 27 spalnych miescaŭ plus byŭ taksama «spalnik» dla źmiennaha kiroŭcy.
Časopis «Avtorieviu», jaki pryśviaciŭ u 1998 hodzie aŭtobusu adnu z natatak, kpiŭ: «Ale ŭsio roŭna — nie nadta ŭtulna, asabliva kali ŭ ciesnym adsieku, pakładzienyja niby sieladcy ŭ bočcy, śpiać 28 čałaviek. A asablivy kamfort, napeŭna, adčuvali siamiejnyja pary, jakija lažali adna nad adnoj…»
Firma vaziła hetym «hatelbusam» turystaŭ z sakavika pa listapad ad Skandynavii da Izraila. U kancy 90‑ch aŭtobus z prabieham 200 tysiač kiłamietraŭ vystavili na prodaž za 100 tysiač dołaraŭ.
Na transpartnych sajtach pišuć, što z 2001 hoda jaho novy ŭładalnik žyŭ ci to ŭ Mikałajevie, ci to ŭ Dnieprapiatroŭsku i arhanizoŭvaŭ pieravozki na čarnamorskija kurorty z roznych haradoŭ. Voś tady jon i źjaŭlaŭsia ŭ Minsku. Akramia Minska, aŭtobus zaŭvažali ŭ Adesie, Danieckaj vobłaści i Sievastopali, jašče jon dakładna chadziŭ pa maršrucie Kijeŭ — Mikałajeŭ, a taksama z Maskvy ŭ Kobleva — i taksama praź Biełaruś.
Ci zručna jeździć u aŭtobusie z łožkami? U teoryi tak: možna vyspacca padčas praciahłaha načnoha pierajezdu ci prosta prylehčy ŭdzień i vyciahnuć nohi, kali jany zaciakli ŭ kreśle. Ale treba taksama pamiatać, što ŭ «nulavych» u Biełarusi, Rasii, Ukrainie było niamała daroh z kiepskim asfaltam, tamu miescami kamfortny son napeŭna źmianiaŭsia treskaj, jakaja ŭ lažačym stanoviščy pieranosicca horš, čym siedziačy. Tym nie mienš, kala dziasiatka hadoŭ hety «hatelbus» vaziŭ adpačyvalnikaŭ na kurort.
Aŭtobus, vidać, niekalki razoŭ źmianiaŭ rehistracyju, tamu što jaho fatahrafavali z roznymi numarami. Pry hetym na aŭtobusie ŭvieś hety čas zachoŭvalisia staryja nadpisy Mezinarodni Autobusová a Kamionová Doprava (mižnarodnyja aŭtobusnyja i hruzavyja pieravozki), Bulva Service i Jiři Kalousek (davoli papularnyja imia i proźvišča ŭ Čechii).
Paśla 2012 hoda ślady aŭtobusa hublajucca, fotazdymkaŭ bolš nie sustrakałasia, — vidać, jaho vyvieli z ekspłuatacyi i, mahčyma, puścili na mietałałom. Prynamsi, u anłajn-bazach, jakija adsočvajuć aŭtobusy, adznačana, što da 2014‑ha aŭtobusa ŭžo nie było «ŭ žyvych».
Ślipierbasy ŭ sučasnym śviecie
Uvohule «ślipinh-basy», abo «ślipierbasy» — aŭtobusy sa spalnymi miescami, — papularnyja ŭ krainach Azii: Pakistan, Vjetnam, Kambodža, Indyja, Kitaj. Dzieści spalnyja miescy vyhladajuć jak pastaŭlenyja adna na adnu raskładanki, dzieści — jak raskošnyja alkovy z televizarami, nakštałt luks-biznes-kłasaŭ u samalotach niekatorych avijakampanij.
Pasažyr atrymlivaje kamfort spalnaha vahona tam, dzie čyhunki niama. Noč u darozie — možna niabłaha vyspacca dy jašče i kino pahladzieć.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč9
Kamientary