Papadaje nie tolki ŭ kroŭ, a i ŭ jaječki. Upakoŭka ź pierapracavanaj papiery moža być bolš niebiaśpiečnaj za płastykavuju
Navukoŭcy vyśvietlili, kolki chimičnych rečyvaŭ traplaje ŭ naš arhanizm z roznych vidaŭ upakoŭki, i dajuć rekamiendacyi.
Navukoŭcy ŭžo šmat hadoŭ viedajuć, što chimičnyja rečyvy mohuć traplać z upakoŭki charčavańnia niepasredna ŭ ježu, a ź joj i ŭ arhanizm čałavieka. Škodnyja rečyvy znajšli nie tolki ŭ kryvi i vałasach, ale i ŭ jaječkach mužčyn.
Jak piša The Washington Post, navukoŭcy z Šviejcaryi i inšych krain praviali daśledavańnie chimičnaj nahruzki ŭpakoŭki praduktaŭ na arhanizm čałavieka. Vyniki pakazali, što z prykładna 14 tysiač viadomych chimičnych rečyvaŭ, jakija ŭ joj utrymlivajucca, u arhanizm traplaje kala 25% (3601 vid).
Da takich škodnych rečyvaŭ adnosiacca mietały, latučyja arhaničnyja złučeńni, PFAS (pier– i paliftarałkilnyja złučeńni), ftałaty i šmat jakija inšyja.
Navukoŭcy adznačajuć, što vysokija tempieratury mohuć pryvieści da chutčejšaha papadańnia chimičnych rečyvaŭ u ježu, tamu rekamiendujuć paźbiahać razahravańnia ježy ŭ mikrachvaloŭcy ŭ kantejnierach.
Pradukty z vysokim utrymańniem tłušču abo kisłotnaściu (naprykład, tamatnyja sousy, sok, hazavanyja napoi, cytrusavyja) taksama majuć tendencyju pahłynać bolš chimičnych rečyvaŭ z upakoŭki, jak i pradukty, jakija ŭpakavany ŭ kantejniery mienšaha pamieru. Śpiecyjalisty tłumačać — čym ciaśniejšy kantejnier, tym bolš kantaktu jon maje ź ježaj unutry.
Pa słovach adnoj z aŭtaraŭ daśledavańnia, hałoŭnaha navukovaha supracoŭnika Forumu pa ŭpakoŭcy charčovych praduktaŭ Džejn Mankie (Jane Muncke), choć bolšaść škodnych rečyvaŭ traplaje ŭ arhanizm z płastykavaj upakoŭki, najbolšuju niebiaśpieku ŭjaŭlajuć pierapracavanyja papiera i kardon.
Jana adznačaje, što heta moža być niečakana dla mnohich, bo zvyčajna ličycca, što pierapracavanyja materyjały bolš ekałahičnyja. Adnak u takoj papiery i kardonie mohuć zastacca reštki čarniła, kleju inšych rečyvaŭ, što vykarystoŭvalisia ŭ makułatury. Jany źmiešvajucca z praduktami, što pavialičvaje ryzyku ich papadańnia ŭ arhanizm.
Vučonyja spadziajucca, što ich daśledavańnie źviernie ŭvahu hramadskaści i vytvorcaŭ na nieabchodnaść bolš starannaha daśledavańnia ŭpakoŭki i pravił abychodžańnia ź joj. Heta dazvolić źmienšyć uździejańnie škodnych rečyvaŭ na ludziej i palepšyć zdaroŭje nasielnictva.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary