Roznyja typy lubovi aktyvizujuć roznyja zony mozhu — vučonyja
Novyja daśledavańni pakazvajuć, što kožny typ lubovi aktyvizuje ŭnikalnyja mazhavyja łancužki. Jakaja luboŭ vyklikaje najbolšuju aktyŭnaść mozhu?
Luboŭnyja pačućci — adny z samych važnych u čałavieka. Luboŭ upłyvaje na farmavańnie i padtrymku parnych suviaziaŭ, pryviazanaści baćkoŭ i dziaciej, a taksama na adnosiny ź inšymi ludźmi i navat pryrodaj. Adnak mała što viadoma pra niejronnyja miechanizmy lubovi za miežami takich jaje typaŭ, jak baćkoŭskaja i ramantyčnaja.
Vučonyja z Univiersiteta imia Aałta (Finlandyja) vykarystali mahnitna-rezanansnuju tamahrafiju dla vymiareńnia aktyŭnaści mozhu ŭ dobraachvotnikaŭ, jakija prasłuchoŭvali papiarednie zapisanuju historyju, a potym imknulisia ŭjavić situacyju, źviazanuju z šaściu roznymi abjektami lubovi: ramantyčny partnior, ułasnaje dzicia, siabar, nieznajomy (tak zvanaja «luboŭ da bližniaha» ŭ chryścijanstvie), svojskaja žyvioła i pryroda.
Svaimi vynikami daśledčyki padzialilisia na staronkach časopisa Cerebral Cortex.
Daśledavańnie vyjaviła, što najbolšuju mazhavuju aktyŭnaść vyklikaje luboŭ da svaich dziaciej, za joju idzie ramantyčnaja luboŭ.
Jak adznačajuć vučonyja, pry baćkoŭskaj lubovi adbyvajecca aktyvizacyja hłybokich struktur mozhu, jakija adkazvajuć za ŭznaharodžańnie, u vobłaści pałasataha cieła. I takoha nie nazirajecca ni pry jakim inšym vidzie lubovi.
Samaj vialikaj niečakanaściu dla daśledčykaŭ stała toje, što vobłaści mozhu, źviazanyja ź luboŭju pamiž ludźmi, akazalisia vielmi padobnymi. Adroźnieńni pamiž imi byli tolki ŭ intensiŭnaści aktyvacyi. Usie typy mižasobavaj lubovi aktyvavali vobłaści mozhu, złučanyja z sacyjalnym paznańniem, u adroźnieńnie ad lubovi da chatnich hadavancaŭ ci pryrody.
Tak, spahadlivaja luboŭ da nieznajomcaŭ mienš zakranała sistemu ŭznaharodžańnia ŭ mozhu i vyklikała jaho mienšuju aktyŭnaść u paraŭnańni ź luboŭju ŭ blizkich adnosinach. U toj ža čas, luboŭ da pryrody aktyvizavała sistemu ŭznaharodžańnia i vizualnyja vobłaści mozhu, adnak nie zakranała tyja častki mozhu, jakija aktyvizujucca pry ŭzajemadziejańni ź inšymi ludźmi i apracoŭcy sacyjalnaj infarmacyi (sacyjalnyja zony mozhu).
Vučonyja zaŭvažyli jašče adnu cikavuju reč, kali jany vyvučali, jak mozh reahuje na luboŭ da žyvioł: pa tym, jak pracujuć peŭnyja ŭčastki mozhu, možna było zrazumieć, ci maje čałaviek chatniuju žyviołu.
U tych, chto žyvie z čatyrochnohim siabram, była zaŭvažanaja bolšaja mazhavaja aktyŭnaść u sacyjalnaj zonie mozhu.
Navukoŭcy spadziajucca, što hetyja viedy mohuć dapamahčy ŭ lačeńni takich prablem, jak parušeńni pryviazanaści, depresija ci prablemy va ŭzajemaadnosinach, a taksama daduć novyja temy dla fiłasofskich dyskusij ab pryrodzie lubovi i čałaviečych suviaziaŭ.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary