U himnazii-kaledžy mastactvaŭ u Minsku zadymiŭsia ŭciaplalnik pad plitami z rośpisam Alesia Puškina
Pryčynaj zadymleńnia stała mikrabijałahičnaje samazaharańnie. To-bok bijałahičnaja aktyŭnaść hrybkoŭ, na dumku ekśpierta, vyklikała pavyšeńnie tempieratury.
U himnazii-kaledžy mastactvaŭ imia Ivana Achremčyka («Parnacie») zadymiŭsia ŭciaplalnik pad naviasnoj stollu ŭ faje adnaho z budynkaŭ. Pra vypadak napisali Minsk-naviny.
Rabotnica ŭstanovy adukacyi, zakrytaj na kapitalny ramont, ubačyła zadymleńnie i vyklikała słužbu vyratavańnia. Supracoŭniki MNS vyjavili try izalavanyja zony sa śladami tleńnia ŭciaplalnika. Jany ŭziali ŭzory materyjału DVP dla praviadzieńnia sudovaj pažarna-techničnaj ekśpiertyzy, — raspaviała vydańniu aficyjnaja pradstaŭnica ŭpraŭleńnia.
Eskpiert znajšoŭ unutry frahmientaŭ DVP ślady žyćciadziejnaści mikraarhanizmaŭ u vyhladzie hrybka i ćvili zialonaha koleru. Pryčynaj zadymleńnia stała mikrabijałahičnaje samazaharańnie. To-bok bijałahičnaja aktyŭnaść hrybkoŭ, pavodle ekśpierta, vyklikała pavyšeńnie tempieratury.
«Mikrabijałahičnaje samazaharańnie, — paviedamlaje vydańnie, — charakterna dla arhaničnych dyśpiersnych i kudzielistych materyjałaŭ, usiaredzinie jakich mahčymaja žyćciadziejnaść mikraarhanizmaŭ. Ich pieršasnaje samanahravańnie adbyvajecca za košt ciapła, jakoje vydatkoŭvajecca mikraarhanizmami, a vyklikanaje im pavyšeńnie tempieratury spryjaje paskareńniu ekzatermičnaj reakcyi, jakaja moža skončycca ŭźniknieńniem hareńnia ŭ samoj nahretaj častcy abjomu. Rost tempieratury, źviazany ź bijałahičnaj aktyŭnaściu hrybkoŭ, vyznačajecca roznaściu pamiž chutkaściu vyłučeńnia ciapła i ciepłastratami».
Choć imia Puškina ŭ dopisie, naturalna, niama, na fatahrafijach, jakimi ilustrujecca zdareńnie ŭ himnazii-kaledžy, — plity DVP z rośpisam Alesia Puškina, vykananym im u jakaści dypłomnaj raboty pa zakančeńni Biełaruskaj akademii mastactvaŭ (tady teatralna-mastackaha instytuta) u 1990 hodzie. Za hetuju pracu jon byŭ rekamiendavany ŭ Sajuz mastakoŭ Biełarusi, adznačaje Reform.news.
Aleś Puškin vučyŭsia ŭ hetaj škole z 6 pa 11 kłas. Kampazicyja jaho dypłoma, vykananaha pa zakančeńni mastackaha VNU, składajecca z troch častak: stol, centralnaja ściana i bakavyja ścieny. Na stoli — baćki-zasnavalniki biełaruskaha prafiesijnaha žyvapisu i prafiesijnaj muzyki. A taksama — postaci, važnyja, na dumku aŭtara, dla luboha biełaruskaha mastaka, siarod jakich znajšłosia miesca Leanarda da Vinčy, Čurlonisu, Uładzimiru Karatkieviču, Michaiłu Kleafasu Ahinskamu, Skarynie i inšym znakavym asobam. Tam ža i simvał pakut — raśpiataja žančyna, i anioł, jaki abviaščaje ab tym, što pryjdzie Zbaviciel.
Na ścienach — mastaki-vykładčyki i navučency. Jość navat scena vyhnańnia sa škoły.
Ciapier los rośpisaŭ niapeŭny. Na zdymkach vidać, što plity mocna paškodžanyja. Chto ciapier zojmiecca ich restaŭracyjaj, taksama nieviadoma.
Kamientary