Cichanoŭski ŭ navahodnim zvarocie zaklikaŭ da «finlandyzacyi», daravańnia tym, «kaho paputaŭ bies», i pavahi da Trampa

U pačatku svajoj krychu bolš jak čatyrochchvilinnaj pramovy Siarhiej Cichanoŭski vykazaŭ zadavalnieńnie, što ŭpieršyniu za 5 hadoŭ sustrakaje Novy hod u pryjemnaj atmaśfiery sa svajoj siamjoj. Dla jaho toje, što ŭdasca vyzvalicca mienavita ŭ adychodziačym hodzie, stała pryjemnaj niespadziavankaj. 

«Nu jakija byli šancy, što dyktatar spatrebicca amierykancam «rašałam» u Kramli, i mianie addaduć jak bujny chabar u hetaj dziŭnaj hulni?» — pytajecca jon i pryznajecca, što z usich mahčymych varyjantaŭ vyzvaleńnia taki dla jaho staŭ samym nievierahodnym. 

Atrymlivajučy asałodu ad svabody, jon, adnak, nie zabyvajecca pra toje, što treba vyzvalać jašče nie tolki inšych palitviaźniaŭ, ale i ŭsiu krainu. I ŭ hetym zvarocie čarhovy raz źviartajecca da nieadnarazova vykazanaj im razam z Vadzimam Prakopjevym idei «finlandyzacyi».

«U razhar novaj Chałodnaj vajny varyjantaŭ u nas niašmat. Nam, biełarusam, vypała žyć na skryžavańni čužych intaresaŭ, stać elemientam vialikaj hulni. I kali adkinuć emocyi i dobra padumać, to varyjantaŭ u Biełarusi ŭsiaho dva, treciaha nie dadziena: ci rasijskaja kałonija, ci finski kampramis, niejtralnaja pałasa pamiž dvuma błokami, dvuma vorahami ŭ chałodnaj vajnie. Ciapier heta zdajecca nievierahodnym, ale chutka abodva nieprymirymyja baki buduć zacikaŭlenyja mienavita ŭ takim raskładzie», — upeŭnieny Cichanoŭski.

Lubyja alternatyŭnyja hetamu pohladu dumki jon nazvaŭ «dziciačymi fantazijami», bo zusim nie vieryć ni ŭ toje, što Rasiju možna pieramahčy na poli boju, ni ŭ toje, što jana źmienicca. 

Zakranuŭ siarod inšaha Cichanoŭski i pytańnie apošniaha vyzvaleńnia palitviaźniaŭ 13 śniežnia z vyvazam ich va Ukrainu. Nie nazyvajučy imionaŭ, jon namiaknuŭ, što słovy niekatorych vyzvalenych palitviaźniaŭ, pramoŭlenyja adrazu paśla vyzvaleńnia, byli niaŭdałymi i zaściaroh ad paŭtareńnia hetych pamyłak jak ich samich, tak i inšych:

«Vy — našy hieroi, vy nam patrebny. Nie śpiašajciesia z vychadam na scenu, nie rabicie pamyłak. Zapoŭnicie spačatku prabieły».

Biełarusam ža jon prosić daravać ich hnieŭ u internecie — tyja, maŭlaŭ, sami pa sabie dobryja, ale ž ciapier im u emihracyi davodzicca vyžyvajuć, voś niervy i nie vytrymlivajuć, tamu «hatovyja sarvacca na lubym viadomym čałavieku». Tamu ničoha i nie zastajecca, jak tolki «abniać i daravać tym, kaho paputaŭ bies». 

Na hetyja samyja emocyi jon śpisvaje i toje, što biełarusy nie schilnyja zachaplacca asobaj Donalda Trampa:

«Trampa tak doŭha i ščyra nienavidziać, što pierastali analizavać jahonyja dziejańni. A miž tym Donald Tramp i Marka Rubia robiać šmat pravilnych rečaŭ. Jany robiać pravilnyja rečy na karyść zachodniaj cyvilizacyi, a značyć i Biełarusi».

Što ž tyčycca biełaruskaj taktyki i stratehii, to:

«Nam, biełarusam, usim razam ciapier i z novymi siłami naležyć spakojna abmierkavać usie varyjanty, damovicca i praciahnuć naš šlach, šlach da svabody, da sapraŭdnaj Krainy dla žyćcia».

«Chaj Boh baronić biełarusaŭ, kožnaha z nas. Žyvie Biełaruś!» — zaviaršyŭ svaju pramovu Siarhiej Cichanoŭski. 

• 10
• 1
• 5
• 8
• 0
• 0
• 1
• 0