Borys Džonsan raskazaŭ, u čym źmiest mirnaha płana Donalda Trampa pa Ukrainie
«Nie zabyvajcie, što mienavita Tramp, a nie Abama abo Bajden, daŭ ukraincam supraćtankavuju zbroju «Džavielin», jakaja stała vyrašalnaj u bitvie za Kijeŭ u 2022 hodzie», — źviartaje ŭvahu eks-premjer Brytanii.
Niekalki dzion tamu były premjer-ministr Vialikabrytanii Borys Džonsan sustreŭsia z kandydatam u prezidenty ZŠA ad Respublikanskaj partyi Donaldam Trampam. Pa viartańni ŭ Vialikabrytaniju jon raskazaŭ Daily Mail ab tym, jak respublikaniec u vypadku pieramohi na vybarach płanuje ŭrehulavać vajenny kanflikt pamiž Rasijaj i Ukrainaj, piša Bild.
Pa słovach Džonsana, płan Trampa nie maje ničoha ahulnaha z aściarohami mnohich jeŭrapiejcaŭ, jakija bajacca, što jon prosta admovicca ad dapamohi Ukrainie ŭ vypadku pieramohi na vybarach.
Naadvarot — Tramp moža navat rezka ŭzmacnić padtrymku Ukrainy na pačatkovym etapie.
«Nie zabyvajcie, što mienavita Tramp, a nie Abama abo Bajden, padaŭ ukraincam supraćtankavuju zbroju «Džavielin», jakaja stała vyrašalnaj u bitvie za Kijeŭ u 2022 hodzie», — skazaŭ Džonsan.
U jakaści pieršaha kroku Tramp — a razam ź im i kiraŭniki inšych zachodnich krain — moh by dazvolić Ukrainie vykarystoŭvać rakiety ATACMS i Storm Shadow suprać aeradromaŭ na terytoryi Rasii. Ukraina ŭžo daŭno zaklikaje Zachad pajści na hety krok, adnak pakul što USU moža atakavać z dapamohaj zachodniaj zbroi tolki asobnyja pazicyi ŭ rasijskich prymiežnych rehijonach.
Pa słovach Džonsana, ździełka moža vyhladać nastupnym čynam: Rasija pavinna budzie adstupić da miežaŭ 24 lutaha 2022 hoda, a Ukraina, adpaviedna, atrymaje nazad usie akupavanyja terytoryi, akramia Kryma. Tady Ukraina zmoža svabodna ŭstupić u ES i NATA, kali aljans budzie da hetaha hatovy.
Uzamien Ukraina moža ŭvieści śpiecyjalnyja zakony ab abaronie ruskaj movy, što dazvoliła b rasijskim uładam zajavić ab dasiahnieńni met «śpiecapieracyi».
Sam Džonsan z aptymizmam hladzić na toje, što respublikaniec zmoža pakłaści kaniec vajnie pamiž Rasijaj i Ukrainaj.
«Paśla razmovy z Donaldam Trampam na hetym tydni ja jak nikoli pierakanany, što ŭ jaho chopić sił i mužnaści, kab vyratavać Ukrainu, ustalavać mir i spynić katastrafičnaje raspaŭsiudžvańnie kanfliktu», — zajaviŭ Džonsan.
Ciapier čytajuć
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj10
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary