Cichanoŭskaja pradstaviła try mahčymyja scenary pieramien u Biełarusi
Try mahčymyja scenary pieramien u Biełarusi pradstaviła demakratyčnaja lidarka Śviatłana Cichanoŭskaja 6 maja ŭ Koŭnie, vystupajučy ź lekcyjaj ab rehijanalnaj stabilnaści i biaśpiecy va Univiersitecie Vitaŭta Vialikaha, piša «Pozirk».
Palityk adrazu abmoviłasia, što «siońnia składana pradkazać, jak budzie raźvivacca situacyja».
Razam z tym, pavodle pieršaha scenaryja, jaki praduhledžvaje pieramohu Ukrainy ŭ raźviazanaj suprać jaje Rasijaj vajnie, «Biełaruś atrymlivaje jašče adzin histaryčny šaniec».
«Čym słabiejšy Pucin, tym słabiejšy Łukašenka, — kanstatavała jana. — Biez padtrymki Rasii režym Łukašenki nie zmoža ŭtrymać uładu, što adkryvaje dla nas akno mahčymaściaŭ. Tamu dapamoha Ukrainie dla pieramohi ŭ vajnie — naš nacyjanalny intares».
Druhi scenar praduhledžvaje «kampramis abo ździełku z Pucinym, jakaja zamarozić kanflikt», i takoha raźvićcia padziej, pavodle słoŭ Cichanoŭskaj, «pažadana paźbiehnuć».
«U takoj situacyi jość ryzyka, što ŭ Biełarusi zachavajecca status-kvo, i Biełaruś zastaniecca pad kantrolem Rasii, — papiaredziła palityk. — U abodvuch dyktataraŭ zjavicca čas, kab umacavać svaju ŭładu i padrychtavacca da novaha napadu. Taki scenar niebiaśpiečny nie tolki dla biełaruskaj niezaležnaści, ale i dla miru ŭ rehijonie».
Treci scenaryj praduhledžvaje nastupleńnie pieramien u Biełarusi da pieramohi Ukrainy. Jana padkreśliła, što «režym Łukašenki značna mienš stabilny, čym zdajecca».
«My nie viedajem, što moža pasłužyć šturškom: ekanamičny kryzis, niezadavolenaść nasielnictva ci raskoł elit, — zajaviła jana. — Navat adsutnaść dyktatara na praciahu niekatoraha času stvaraje vakuum ułady i paralizuje sistemu. Takija źmieny mohuć stać pierałomnym momantam».
«Va ŭsich troch scenarach isnuje mnostva pieramiennych. My nie viedajem, jak i kali adbuducca źmieny. Ale my pavinny być hatovy skarystać mahčymaść, kali jana zjavicca», — padkreśliła Cichanoŭskaja.
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks13
Kamientary