U Niamieččynie sudziać žančynu, jakaja 30 hadoŭ krała tavary z kramaŭ. «Ułoŭ» skłaŭ 20 ton
Košt usich vykradzienych rečaŭ składaje amal paŭmiljona jeŭra.
47-hadovaja Hryt V. z Desau za apošnija 30 hadoŭ skrała z kram stolki tavaraŭ, što zapoŭniła imi ŭsiu kvateru i padvalnaje pamiaškańnie. Jana zachoŭvała rečy ŭ 1700 skrynkach, miaškach i sumkach, a ahulnaja vaha skradzienych tavaraŭ skłała bolš za 20 ton, piša Bild.
Pa papiarednich padlikach, košt usich vykradzienych rečaŭ składaje amal paŭmiljona jeŭra.
Charakterna, što Hryt V. navat nie vymała bolšaść vykradzienych rečaŭ sa spakavanaha. Miarkujučy pa ŭsim, jany byli joj nie patrebnyja.
Dla taho, kab vyvieźci rečy, znojdzienyja ŭ jaje doma, palicyi pryjšłosia vyklikać hruzavy aŭtamabil, jaki ździejśniŭ niekalki rejsaŭ.
Prakuratura naličyła ŭ dziejańniach Hryt V. 141 kryminalnaje złačynstva. Žančyna krała instrumienty, adzieńnie, cacki, pyłasosy, leki i navat nasieńnie, jakimi paśla nijak nie karystałasia.
Ab pieršych złačynstvach Hryt V. stała viadoma jašče ŭ 2019 hodzie, kali krama DIY padała zajavu ab kradziažy tavaraŭ na 1 000 jeŭra.
Abvinavačanaja žyvie adna, u jaje niama ni muža, ni dziaciej. Pry hetym Hryt V. nikoli nie sprabavała pierapradać vykradzienyja rečy i prosta składziravała ich u kvatery i ŭ padvale.
Pavodle papiaredniaj viersii, žančyna pakutuje na patałahičny absiesiŭna-kampulsiŭny razład.
Sud razhledzić pytańnie ab adpraŭcy padsudnaj u śpiecyjalizavanuju psichijatryčnuju ŭstanovu.
Kamientary