Žychara Ivacevičaŭ asudzili na paŭtara hoda «chimii» za kamientar u bok milicyjanta
U sudzie Ivacevickaha rajona 19 lutaha asudzili Maksima Hurynoviča pavodle art. 369 (abraza pradstaŭnika ŭłady). Sudździa Siarhiej Kuchackavolec pryznačyŭ Maksimu paŭtara hoda abmiežavańnia voli z nakiravańniem u papraŭčuju ŭstanovu adkrytaha typu («chimii») i štraf 50 bazavych (2000 rubloŭ).
Mužčynu abvinavacili ŭ tym, što jon u «Adnakłaśnikach» u hrupie «Biełsat» pakinuŭ kamientar pad fotazdymkam milicyjanta, jaki ŭ Ivacevičach zajmajecca ekanamičnymi złačynstvami. Sud paličyŭ kamientar abraźlivym, piša «Viasna».
Na sudzie Maksim paviedamiŭ, što ŭ adnoj z hrup u sacsietcy jon pračytaŭ pra žančynu, jakaja sama haduje niepaŭnaletniaje dzicia. Joj prysudzili dva hady «chatniaj chimii» i štraf za «abraźlivy simvał» pad fotazdymkam milicyjanta.
Heta aburyła Maksima i jon pakinuŭ kamientar u bok milicyjanta K. u «Adnakłaśnikach». U 2020 hodzie padčas pratesnych akcyj «abražany» milicyjant u Ivacevičach byŭ pryznačany zajmacca achovaj hramadskaha paradku.
Milicyjant zaprasiŭ materyjalnuju kampiensacyju maralnaj škody 2000 rubloŭ.
Telefon mužčyny kanfiskavali jak «srodak ździajśnieńnia złačynstva».
Maksim Hurynovič całkam pryznaŭ vinu. Da suda jon znachodziŭsia pad padpiskaj ab niavyjeździe. Mužčyna maje siaredniuju adukacyju, jeździć u Rasiju na zarobki.
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary