Dzieci zakidali śniežkami Viečny ahoń pad Pieciarburham. Ich vydvarać z Rasii razam z baćkami
U niadzielu ŭ Krasnym Siale pad Pieciarburham troje padletkaŭ hulali kala Viečnaha ahniu: adzin zakidaŭ ahoń śnieham i patušyŭ jaho, paśla čaho dzieci ŭciakli.
Na nastupny dzień, 11 śniežnia, palicejskija znajšli dziaciej ź videa: heta akazalisia dva braty 10 i 14 hadoŭ i jašče adzin chłopčyk 12 hadoŭ. Vyśvietliłasia, što ich siemji pryjechali z Uźbiekistana i znachodzilisia na terytoryi Rasii nielehalna, parušajučy mihracyjnaje zakanadaŭstva, piša Bi-bi-si.
Siońnia ich spravu razhledzieŭ Krasnasielski rajonny sud: palicyja patrabavała vypravadzić siemji z Rasii, i sud z hetym pahadziŭsia.
Sud pryznačyŭ kožnamu štraf pamieram 5 000 rubloŭ (55 dalaraŭ) — i administracyjnaje prymusovaje vydvareńnie z krainy.
Pa danych pieciarburhskaha HUUS, ciapier baćki školnikaŭ źmieščanyja ŭ śpiecyjalny centr dla zamiežnych hramadzian, jakija padlahajuć vypravadžeńniu. Dvoje dziaciej časova adpraŭlenyja ŭ «śpiecustanovu». A treci chłopčyk, jaki na videa jakraz i zakidvaje Viečny ahoń śnieham, patrapiŭ u palicejski centr časovaha ŭtrymańnia niepaŭnaletnich pravaparušalnikaŭ. Usich dziaciej adpraviać na radzimu razam z baćkami.
Anałahičnaja historyja adbyłasia ŭ listapadzie ŭ Narylsku. 19 listapada dvoje školnikaŭ 10 i 11 hadoŭ zakidali śnieham Viečny ahoń ź cikaŭnaści: im było cikava, patuchnie połymia ci nie. Dzieci taksama patrapili na videa.
Kiraŭnik Śledčaha kamiteta Rasii Alaksandr Bastrykin daručyŭ raspačać kryminalnuju spravu ab apahanieńni simvałaŭ voinskaj słavy hrupaj asob pa papiaredniaj zmovie. Ale kali vyśvietliłasia, što parušalniki jašče nie dasiahnuli ŭzrostu kryminalnaj adkaznaści, spravu zakryli.
Ciapier čytajuć
Ministr suviazi: Abmiežavańni mabilnaha internetu zakranuć 1,7 miljona biełarusaŭ18
Kamientary
Heta było jašče padčas 'druhich' Savietau, zaraz toj 'viečny vahoń' zapalvajuć kali- nikali...