Pa fakcie incydentu na «Biełaruśkalii» zaviali kryminalnuju spravu
Praca na miescy zdareńnia praciahvałasia ŭsiu noč, paviedamlaje Śledčy kamitet.
Paviedamlajecca, što śledčyja razam sa śpiecyjalistami kamiteta sudovych ekśpiertyz praviali ahlad miesca zdareńnia.
Upraŭleńniem Śledčaha kamiteta pa Minskaj vobłaści zaviedziena kryminalnaja sprava pa č.2 art.306 (parušeńnie praviłaŭ achovy pracy, jakoje paciahnuła pa nieaściarožnaści pryčynieńnie ciažkaha cialesnaha paškodžańnia dźvium abo bolš asobam) Kryminalnaha kodeksa Biełarusi.
Zaznačajecca, što ŭ ramkach rasśledavańnia kryminalnaj spravy ŭvaha budzie ŭdzielena vyśviatleńniu pryčyn i ŭmoŭ, jakija pryviali da traŭmavańnia rabotnikaŭ.
Zdareńnie na «Biełaruśkalii» adbyłosia ŭčora ŭviečary.
Tam zdaryłasia zachrasańnie kleci ŭ šachtavym stvale № 3 na adznacy minus 445 mietraŭ na terytoryi 2-ha rudaŭpraŭleńnia. U kleci było piać rabotnikaŭ pradpryjemstva, jakich potym padniali.
Adnaho z rabotnikaŭ, 32-hadovaha mužčynu, adrazu špitalizavali, papiarednie daktary dyjahnastavali ŭ jaho paškodžańnie chrybta. Druhi paciarpieły mieŭ pierałom chrybta i kancavin.
Paźniej u salihorskuju balnicu dastavili i treciaha šachciora — u jaho ciažkija traŭmy, u tym liku pierałom nižnich kancavin.
Pavodle papiaredniaj infarmacyi, va ŭsich piaciarych rabotnikaŭ (im ad 25 da 38 hod) byli ciažkija spałučanyja traŭmy — pierałomy klučyc, chrybta, taza i nižnich kancavin.
Pa rasparadžeńni ministra achovy zdaroŭja Dźmitryja Pinieviča ŭ salihorskuju CRB nakiravali bryhadu vysokakvalifikavanych śpiecyjalistaŭ (śpinalny chirurh i traŭmatołah-artapied) RNPC traŭmatałohii i artapiedyi.
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary