Vykładčycam i zahadčycy studenckaha internata dali «chatniuju chimiju»
Sud Frunzienskaha rajona Minska 31 kastryčnika vynies prysud vykładčycam Natalli Sivickaj, Nadziei Staravojtavaj i zahadčycy studenckaha internata Alenie Drabudźka. Ich abvinavacili va ŭdziele ŭ akcyjach pratestu ŭ 2020 hodzie (č. 1 art. 342) i padpiscy na «destruktyŭnyja» kanały, piša «Viasna».
Natalla Sivickaja da zatrymańnia pracavała dacentkaj kafiedry biełaruskaj i ruskaj moŭ BDUFK, jana kandydat fiłałahičnych navuk. U videa na praŭładnych kanałach jana kaža, što ŭdzielničała ŭ pratestach.
Nadzieja Staravojtava — vykładčyca biełaruskaj movy, kandydatka fiłałahičnych navuk i dacentka kafiedry biełaruskaj i ruskaj moŭ. Nadzieju zatrymali 23 lipienia 2023 hoda. U pakajannym videa siłavikoŭ jana kaža, što naviedvała mitynhi ŭ 2020 hodzie, padčas jakich vychodziła na darohu, zarehistravałasia ŭ płanie «Pieramoha» i była padpisana na «destruktyŭnyja» kanały.
Alenu Drabudźka zatrymali na pačatku žniŭnia 2023 hoda. Jana pracavała zahadčycaj internata №4 BDEU.
Praŭładnyja telehram-kanały śćviardžali, što žančyna «padbuchtorvała studentaŭ da ŭdziełu ŭ parušeńni zakona ŭ 2020 hodzie i ahitavała suprać ułady da hetaha času». Na videa siłavikoŭ zatrymanaja kaža, što ŭdzielničała ŭ adnoj ź mirnych akcyj pratestu ŭ 2020-m hodzie.
Spravu razhladała sudździa Alena Bušava.
Jak stała viadoma «Radyjo Svaboda», vykładčycy Nadzieja Staravojtava i Natalla Sivickaja atrymali pa try hady abmiežavańnia voli («chatniaja chimija»), zahadčyca internata Alena Drabudźka — 2,5 hoda «chatniaj chimii».
Ciapier čytajuć
Stali viadomyja novyja detali ŭ maštabnaj spravie arhanizataraŭ kancertaŭ4
Kamientary