Redahavańnie vyjaŭ z dapamohaj hienieratyŭnaha ŠI prychodzić u Instagram
Meta, jak i abiacała, pačynaje pryŭnosić štučny intelekt va ŭsie svaje pradukty.
Na adnym z apošnich mierapryjemstvaŭ kampanii Meta byli pakazanyja novyja funkcyi štučnaha intelektu dla redahavańnia vyjaŭ i stvareńnia stykieraŭ dla Instagram.
Novaja pryłada pad nazvaj restyle budzie dazvalać karystalnikam rabić «remiks» svaich isnych fota ŭ roznych stylach. Naprykład, možna ŭvieści deskryptar (tekstavuju padkazku) «akvarel» — i atrymać abroblenuju vyjavu ŭ styli malunka akvarelevaj farbaj. Albo možna ŭvieści padrabiaźniejšuju padkazku, naprykład, «kałaž z časopisaŭ i haziet, irvanyja krai», i atrymać novy malunak u adpaviednaj kałažnaj stylistycy.
Kampanija taksama prademanstravała novy instrumient pad nazvaj backdrop («fon»), svojeasablivuju funkcyju zialonaha ekrana na bazie ŠI. Karystalniki mohuć uvodzić padkazki nakštałt «pastavić mianie pierad vieličnym palarnym źziańniem», kab stvaryć novuju viersiju vašaha fota z adpaviednym fonam. Engaget raspaviadaje, što pakul nieviadoma, kali funkcyi «restajlinhu» i «fonu» buduć dastupnyja dla karystalnikaŭ, ale ŭ Meta zajavili, što jany źjaviacca «nieŭzabavie».
Vyjavy, stvoranyja z dapamohaj novych ŠI-instrumientaŭ, buduć mieć cetliki z paznakaj ab vykarystańni štučnaha intelektu dla źnižeńnia vierahodnaści taho, što ludzi prymuć ich za kantent, stvorany čałaviekam. Meta nie padzialiłasia, jak dakładna buduć vyhladać hetyja cetliki, ale infarmacyjnyja ekrany z nadpisam image generated by Meta AI raniej užo byli zaŭvažanyja niekatorymi karystalnikami ŭ Instagram.
Meta taksama prademanstravała novyja stykiery, stvoranyja z dapamohaj ŠI, jakija buduć dastupnyja ŭ Instagram, WhatsApp, Messenger i Facebook Stories. Funkcyja dazvalaje karystalnikam chutka stvarać ułasnyja stykiery dla svaich čataŭ i historyj z dapamohaj tekstavych padkazak. Stykiery buduć raspaŭsiudžvacca «dla vybranych anhłamoŭnych karystalnikaŭ» prahram kampanii «ciaham nastupnaha miesiaca», zajavili ŭ Meta.
Hetyja funkcyi źjavilisia paśla taho, jak Mark Cukierbierh nieadnarazova abiacaŭ, što hienieratyŭnyja funkcyi štučnaha intelektu źjaviacca ŭ kožnaj prahramie, jakaja naležyć Meta. Akramia taho, dla zadavalnieńnia kankretnych nišavych intaresaŭ kampanija taksama anansavała bolš za 25 hienieratyŭnych čat-botaŭ na bazie ŠI, u tym liku niekalki zasnavanych na realnych znakamitaściach i stvaralnikach. Hetyja asoby buduć ahučanyja roznymi sučasnymi ŭpłyvovymi ludźmi i znakamitaściami.
Ciapier čytajuć
Na vajskovyja zbory masava zabirajuć hrodziencaŭ. A što minčuki? Padrychtujciesia, vaša čarha — 2027‑2028 hady6
Na vajskovyja zbory masava zabirajuć hrodziencaŭ. A što minčuki? Padrychtujciesia, vaša čarha — 2027‑2028 hady
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary