U adnoj ź minskich paliklinik startavała biaspłatnaja vakcynacyja suprać hrypu
Biaspłatna pryščapicca suprać hrypu možna z 26 vieraśnia ŭ 6-j centralnaj rajonnaj kliničnaj paliklinicy Leninskaha rajona.
Jak patłumačyła Minsk-navinam zahadčyca adździaleńnia ahulnaj miedyčnaj praktyki № 2 Alena Pilipčuk, na vakcynacyju suprać hrypu zaprašajuć u pieršuju čarhu asob z chraničnymi zachvorvańniami sardečna-sasudzistaj, endakrynnaj sistem i orhanaŭ dychańnia, z atłuścieńniem, a taksama ludziej starejšych za 60 hadoŭ. Akramia taho, kaleh — miedycynskich rabotnikaŭ, ciažarnych i žančyn, jakija płanujuć ciažarnaść.
Taksama biaspłatnaja vakcynacyja suprać hrypu pravodzicca dla asob, jakija zabiaśpiečvajuć žyćciadziejnaść stalicy abo zaniatych u handli, hramadskim charčavańni, adukacyi. Taksama biaspłatna suprać hrypu pryščepiać sacyjalnych rabotnikaŭ.
Pa słovach A. Pilipčuk, biaspłatna pryščaplajuć inaktyvavanaj vakcynaj rasijskaj vytvorčaści. Preparat vyrableny Sankt-Pieciarburhskim navukova-daśledčym instytutam vakcyn i syvaratak. Vakcyna trochvalentnaja. U štamavym składzie preparata, abnoŭlenaha na hety epidemičny siezon u adpaviednaści z rekamiendacyjami Suśvietnaj arhanizacyi achovy zdaroŭja, — virusy hrypu A/(H1N1), A/(H3N2) I st.
Vakcyna prymianiajecca ŭ Biełarusi ŭpieršyniu, adnak u Rasii jaje ŭžo paśpiachova vykarystoŭvali letaś. Pa słovach śpiecyjalistaŭ, preparat pieranosicca dobra, efiektyŭnaść vysokaja.
A. Pilipčuk taksama dadała, što pryščepki suprać hrypu možna zrabić u budnyja dni i ŭ suboty — u hadziny pracy palikliniki.
— Pierad praceduraj vakcynacyi abaviazkovy ahlad pacyjenta miedrabotnikam na pradmiet adsutnaści supraćpakazańniaŭ, — patłumačyła A. Pilipčuk. — U čałavieka nie pavinna być abvastreńnia chraničnych zachvorvańniaŭ.
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary