Kiraŭnik małdoŭskaha «Sputnika», jakoha vyhnali z krainy, akazaŭsia aficeram HRU
Kiraŭnika prapahandysckaha vydańnia «Sputnik Małdova» Vitala Dzianisava 13 vieraśnia vydvaryli z krainy praz padazreńni va ŭmiašalnictvie ŭ jaje ŭnutranyja spravy. Žurnalisty vyśvietlili, što jon kadravy rasijski aficer.
Jak śćviardžaje The Insider, Dzianisaŭ — supracoŭnik 72-ha centra śpiecyjalnaj słužby (vajskovaja čaść HRU №54777). Centr u intaresach HRU zajmajecca infarmacyjnymi ŭkidami i dezynfarmacyjaj zamiežnaj aŭdytoryi.
Admietna, što Dzianisaŭ naradziŭsia ŭ Zakarpackaj vobłaści Ukrainy i vučyŭsia ŭ Lvoŭskim vajskova-palityčnym vučyliščy. U 1992 hodzie jon admoviŭsia prymać prysiahu va Ukrainie i razam ź inšymi admoŭnikami z vučylišča pierabraŭsia ŭ Maskvu. Tam jaho pasialili ŭ aficerskim internacie niedaloka ad štab-kvatery Hałoŭnaha raźviedvalnaha ŭpraŭleńnia.
Pa źviestkach The Insider, niekatory čas Dzianisaŭ pracavaŭ u haziecie Minabarony RF «Krasnaja źviezda», dzie ŭ asnoŭnym aśviatlaŭ dziejnaść PDV. U 2013 hodzie Dzianisaŭ pracavaŭ u Hałoŭnym śledčym upraŭleńni Maskoŭskaj vobłaści. Žurnalisty nie zdoleli vyśvietlić, čym jon tam zajmaŭsia.
Sa Śledčaha kamiteta Dzianisaŭ pierajšoŭ u 72-i centr śpiecyjalnaj słužby. U 2016 hodzie jamu prysvoili zvańnie pałkoŭnika PDV, a ŭ 2019-m pryznačyli hałoŭnym redaktaram «Sputnika» ŭ Paŭdniovaj Asiecii. Paśla hetaha jon uznačaliŭ radyjostancyju ŭ Baku, a ŭ 2022 hodzie pierajechaŭ u Kišynioŭ.
Kiraŭnik Lidy zaklikaŭ siłavikoŭ nie spyniać palityčnych represij28
Kamientary
Tre adznačyć, što prysiahu Ukrainie nie prynosiŭ i niejkaje skažonaje razumieńnie prystojnaści jon maje.
Heta ŭ ich šerahach nie takaja častaja źjava.