«Źmirałasia z takoj niedarečnaj śmierciu». Minskaja madel ledź nie zahinuła, katajučysia na vadzie na hidrafojle
Minčanka zachacieła asvoić navamodnuju došku. U vyniku jaje cudam uratavali siabry, kali jana zvaliłasia ŭ vadu — vałasy namatała na pracujučy vint, i dziaŭčyna pad vadoj stała hublać prytomnaść.
«Vałasy zakruciła na vint, i stała zaciahvać pad vadu»
Hidrafojł — heta doška dla siorfinhu z prymacavanym kryłom i mahutnym elektramatoram. Razhaniajučysia, takoje prystasavańnie ŭzdymajecca nad pavierchniaj vady, stvarajučy ŭražańnie palotu.
«Vyhladała ŭ rekłamie niejmavierna efiektna, i my vyrašyli pasprabavać», — napisała ŭ instahramie žycharka stalicy Tonia Kasatkina pierad tym, jak padzialicca, jaki žach pieražyła padčas katańnia na hetaj došcy na Minskim mory 20 žniŭnia minułaha hoda.
Tonia zaniataja ŭ madelnym biznesie. Katacca na hidrafojle jana vypraviłasia ź siabroŭkaj u supravadžeńni jaje muža. Jon nie ŭchvalaŭ idei dziaŭčat i ŭratavaŭ žyćcio Toni.
Tonia piša, što supracoŭnik firmy, jakaja arhanizuje katańni, pračytaŭ instruktaž pa kiravańni doškaj z matoram. Daŭhija vałasy, sabranyja ŭ pučok, pieraškadžali dziaŭčynie nadzieć šlem. Tady jana zaviazała chvost. Jak vynikaje z apoviedu dziaŭčyny, instruktar nie papiaredžvaŭ jaje pra niebiaśpieku ad daŭhich vałasoŭ.
Dziaŭčyna piša, što jana za niešta raśpisałasia i pryhladu za joj padčas katańnia nie było.
«Nijakaha šancu na vyratavańnie ŭ vypadku čaho», — adznačyła jana.
Kali Tonia ŭpała z doški, jaje vałasy zakruciła na vint i zaciahnuła pad vadu.
«Adzin raz ja zmahła ŭspłyć i ŭskryknuć», — zhadvaje ŭ dopisie dziaŭčyna.
«Ja z usich sił sprabavała ŭspłyć, ale vałasy vielmi mocna namatalisia na vint, jaki znachodziŭsia na hłybini adnaho mietra pad vadoj. Dalej uvieś čas pad vadoj ja źmirałasia z takoj niedarečnaj śmierciu, uspłyć nie atrymlivałasia».
Pieršym na kryk Toni prypłyŭ na łodcy muž siabroŭki. Jon pasłuchaŭsia žonki i ŭziaŭ čovien na prakat, kab być napahatovie ŭ vypadku fors-mažoru.
Mužčyna vyciahnuŭ Toniu z-pad vady ŭ toj momant, kali jana hublała prytomnaść. Razam z žonkaj, jakaja padaśpieła na dapamohu, jaje trymali na pavierchni. Aboje nie mahli daciahnucca da telefonaŭ, kab vyklikać ratavalnikaŭ.
«Luby ruch abo apuskaŭ mianie pad vadu, abo pryčyniaŭ mnie piakielny bol z-za naciahnutych vałasoŭ», — apisvaje situacyju Tonia.
Tolki praz 30 chvilinaŭ jany dačakalisia dapamohi. Instruktar nažnicami adrezaŭ vałasy dziaŭčynie. Kali jana apynułasia na bierazie, jaje adrazu zabrała chutkaja.
«Ja adčuvała siabie ŭ absalutnym šoku, nie mahła zrazumieć, jak vyžyła. Ja šmat płakała», — apisvaje svoj stan pa vyratavańni madel.
Dziaŭčyna prabyła ŭ balnicy sutki i ciapier sprabuje žyć dalej.
«Kožny raz, kali baču rekłamu hidrafojłaŭ, mianie prosta pačynaje treści», — adznačaje Tonia. Jana dadaje, što pracuje ź psichołaham.
Jak vynikaje z dopisu, Tonia navažyłasia raskazać ab zdareńni, ubačyŭšy rekłamu arhanizataraŭ katańnia na hidrafojłach. Jana źjaviłasia ŭžo paśla incydentu.
Dziaŭčyna pierakananaja, što pravierka, jakoj zaniatyja MNS i Tavarystva ratavańnia na vodach, situacyi nie pamianiaje.
«Mahčyma, moj post kahości zmusić zadumacca ab ułasnaj biaśpiecy. Pierastrachavacca sto razoŭ. Udakładnić usie niuansy», — zaścierahaje Tonia.
Što kažuć u firmie, dzie zdavali došku ŭ prakat?
U firmie, pra jakuju raskazała Tonia, pryznajuć, što incydent byŭ. Ale ličać viersiju dziaŭčyny «krychu pierabolšanaj».
Tam śćviardžajuć, što pryčynaju incydentu stała nievykanańnie dziaŭčynaj praviłaŭ techniki biaśpieki. Pavodle supracoŭnikaŭ, takoje zdareńnie — adzinkavy vypadak za čas ich dziejnaści.
«Čałaviek hetych praviłaŭ da kanca nie vykonvaŭ. Paŭpłyvać na situacyju nie možam i vielmi pieražyvajem za dziaŭčynu, ale da hetaj situacyi pryviała nie naša praca», — nastojvajuć arhanizatary pasłuh.
«Taki vid sportu hetaki ž ekstremalny, jak i vejksiorfinh, skačok z parašutam abo z mosta», — dadajuć jany.
«My dajem mahčymaść pakatacca i adčuć palot nad vadoj, tamu z radaściu pakatajem i vas, jak vyznačyciesia», — adpisali ź firmy žurnalistu «Našaj Nivy», jaki nazvaŭsia ich patencyjnym klijentam.
Jak udałosia vyśvietlić, punkt prakatu, dzie adbyŭsia incydent, ciapier nie pracuje.
«Ekstremalny vid sportu, spałučany z ryzykaj»
Znaŭcy hidrafojłaŭ zapeŭnivajuć, što dla avałodańnia bazavymi navykami kiravańnia takim aparatam dastatkova 15 chvilinaŭ. Navičkam nieabaviazkova ź pieršych zaniatkaŭ stanavicca na došku ŭ poŭny rost. Možna katacca spačatku na kaleniach.
Pavodle ich, arhanizatary takich pasłuh pavinny vydać klijentam šlem, hidrakaścium, vyratavalnuju kamizelku i pravieści pačatkovy instruktaž pa technicy biaśpiecy. Naprykład, papiaredzić, što vałasy treba schavać u hidrakaścium. A padajučy z hidrafojła, pastaracca adskočyć ad jaho padalej.
«Hetyja dva momanty harantujuć biaśpiečnaje katańnie, a jany byli parušanyja», — raskazaŭ adzin z karystalnikaŭ hidrafojła.
U Biełarusi hidrafojł stali zdavać u arendu ŭ 2022 hodzie. Heta zadavalnieńnie nie z tannych. 30-chvilinnaja pajezdka abychodzicca klijentu da 160 rubloŭ. Firmaŭ, jakija akazvajuć takija pasłuhi, u Biełarusi niašmat.
U niekatorych papiaredžvajuć, što zabava z hidrafojłam — ekstremalny vid sportu, tamu spałučany z ryzykaj.
«Naša Niva» — bastyjon biełaruščyny
PADTRYMAĆHladzicie taksama:
«Samy hłyboki ŭdych»: zachaplalnaje i trahičnaje padarožža ŭ śviet frydajvinhu
Žančyna z fota pasiarod Śvisłačy raskazała, što jana tam rabiła
U Minsku možna pakatacca na sup-bordzie. Ale što heta takoje? VIDEA
Pad Stoŭbcami prajšła zakrytaja rejv-viečarynka, jakaja skončyłasia trahiedyjaj
Kamientary