Novaje słova ŭ pierasoŭvańni pa vadzie. Moža, praz kolki hod budziecie tak dabiracca na pracu pa Niomanie ci Prypiaci

Jak pryžylisia elektrasamakaty na ziamli, hetak ža, ličyć amierykaniec Kaj Leni, pryžyvucca i fojłbordy na vadzie, piša The Wall Street Journal. 

Siorfinhist z čatyroch hadoŭ, uradženiec Havajskich vyspaŭ, Kaj pryjazdžaje ŭ Ńju-Jork na fojłbordzie i pierakanany, što heta najlepšy srodak dla padarožžaŭ praz raku Hudzon, jakuju astatnija žychary horada vymušanyja padoŭhu pieraadolvać na paromie.

Najmienšy asabisty vodny transpart, fojłbord, składajecca ź siorfinhavaj doški i padvodnaj mačty, da jakoj prymacavany płaŭnik z kryłom, jak u samalota.

Pryncyp pracy hetaj doški taki: pry nabory chutkaści mačta padymaje došku na 30-60 sm nad pavierchniaj vady, i siorfier ruchajecca napierad, łoviačy siłu chvali, navat vielmi maleńkaj, pry minimalnym supraciŭleńni vady. Siorfier kiruje doškaj pry dapamozie cisku noh. Niekatoryja madeli praduhledžvajuć i elektramatory na soniečnaj batarei.

Siorfier Kaj Leni maryć papularyzavać fojłbord: z adnaho boku, heta dazvolić razhruzić darohi, ź inšaha boku, heta adzin z samych ekałahična čystych vidaŭ transpartu, z nulavym vykidam hazaŭ.

U eru vysokich koštaŭ na haz, doška moža surjozna transfarmavać haradskuju kulturu i harmanična ŭpisacca ŭ naša zvykłaje žyćcio. Kaj śćviardžaje, što jon moža raźvivać chutkaść na svajoj došcy da 64 km u hadzinu. Ale pakul pierad raspracoŭščykami i papularyzatarami fojła staić šmat pieraškod.

Pa-pieršaje, košt takoj doški pakul vysoki — 14 tysiač dalaraŭ. Chacia, jak i lubaja techničnaja reč, z časam jana budzie stanavicca ŭsio bolš i bolš dastupnaj.

Pa-druhoje, musiać być prakładzienyja admysłovyja maršruty dla rehularnych padarožžaŭ na fojłbordach — kab siorfiery nie sutykalisia z karablami i kab jany viedali, dzie padzaradzić soniečnuju batareju pry patrebie.

Pa-treciaje, važna pradumać biaśpieku kiroŭcy — samo padvodnaje kryło vostraje i moža paranić u vypadku avaryi.

Nieŭzabavie došku možna budzie zaličyć da haradskoha transpartu pa vodnych šlachach u takich haradach, jak Ńju-Jork i Stakholm. Ale hałoŭnaja zadača — zrabić fojłbord asnoŭnym transpartnym srodkam, na jakim ludzi buduć pierasoŭvacca miž vyspami, naprykład, na Havajach.

Kampanija Kaja Leni i jaho brata niadaŭna vypuściła elektrafojł, jaki moža raźvivać chutkaść da 48 km u hadzinu. Jon žyvicca ad takoha ž lityj-ionnaha akumulatara, jaki vykarystoŭvajuć u dronach. Dziela ekśpierymientu, siorfier prajechaŭ na im 88 km (adpraviŭšysia z anhlijskaha bieraha, jon abahnuŭ vyspu Uajt u pralivie Ła-Manš i viarnuŭsia), u ofisnym kaściumie i z zaplečnikam — i navat nie zapyrskaŭsia.

Praź piać-dziesiać hadoŭ takija elektrafojły zmohuć katać pa niekalki pasažyraŭ, i na ich jašče budzie vodaniepranikalnaje miesca dla bahažu.

Urešcie vada pakryvaje 71% pavierchni płaniety — daŭno para pačać pierasoŭvacca pa joj dy razhruzić ziamlu.

Ambicyjny prajekt Džefa Biezasa: kaśmičnaja stancyja dla turystaŭ. Jana budzie paraŭnalnaja z MKS

Pierśpiektyŭnaja technałohija: hnoj na fiermach buduć apracoŭvać płaźmiennym zaradam

• 0
• 0
• 0
• 0
• 0
• 0
• 0
• 0