Minabarony Rasii pakazała pieršaje videa z Hierasimavym paśla buntu Pryhožyna
Ministerstva abarony Rasii siońnia pakazała videa z načalnikam Hienštaba i kamandujučym Abjadnanaj hrupoŭkaj vojskaŭ u zonie bajavych dziejańniaŭ na terytoryi Ukrainy Valeryjem Hierasimavym. Heta pieršaje źjaŭleńnie hienierała na publicy paśla buntu PVK «Vahnier» 23-24 červienia i paviedamleńniaŭ ab adchileńni Hierasimava, jakija źjavilisia ŭ miedyja napiaredadni.
Śćviardžajecca, što narada prajšła paśla sprob USU udaryć rakietami S-200 pa abjektach u anieksavanym Krymie, Rastoŭskaj i Kałužskaj abłaściach 9 lipienia, piša Ruskaja słužba «Radyjo Svaboda».
Na videa, apublikavanym Minabarony, Hierasimaŭ zasłuchaŭ dakład načalnika Hałoŭnaha štaba PKS Viktara Afzałava.
Pry hetym u kadry adsutničaŭ hałoŭnakamandujučy PKS Siarhiej Suravikin. Hienierał taksama nie siadzieŭ u prezidyumie razam z Hierasimavym, choć źjaŭlajecca jahonym namieśnikam u kiraŭnictvie hrupoŭkaj rasijskich vojskaŭ va Ukrainie.
Paśla niaŭdałaha buntu kiraŭnika PVK «Vahnier» Jaŭhiena Pryhožyna raspaŭsiudžvajucca roznyja čutki pra miescaznachodžańnie Suravikina, u pryvatnaści, što jon moh być aryštavany. Pavodle inšych źviestak, jaho dapytali i adpuścili. Aficyjna pra los namieśnika kamandujučaha hrupoŭkaj rasijskich vojskaŭ va Ukrainie nie paviedamlałasia.
Napiaredadni brytanskaja hazieta Daily Mail, spasyłajučysia na svaje krynicy ŭ Rasii, pisała, što Hierasimaŭ adchileny ad svaich abaviazkaŭ. Pavodle viersii vydańnia, paśla buntu Jaŭhiena Pryhožyna i viartańnia vyzvalenych z rasijskaha pałonu kamandziraŭ pałka «Azoŭ» z Turcyi va Ukrainu Hierasimava nibyta zamianiŭ kamandujučy PDV hienierał-pałkoŭnik Michaił Ciaplinski.
23 červienia stvaralnik PVK «Vahnier» Jaŭhien Pryhožyn paviedamiŭ pra nibyta naniesienyja pa tyłach «Vahniera» rakietnyja ŭdary z boku rehularnaha vojska Rasii. Paśla hetaha jon abviaściŭ, što 25 tysiač bajcoŭ «Vahniera» adpraŭlajucca va ŭzbrojeny pachod na Maskvu, kab pryciahnuć da adkaznaści kiraŭnictva Ministerstva abarony Rasii, a kankretna ministra abarony Siarhieja Šajhu i kiraŭnika Hienštaba Valeryja Hierasimava. The Wall Street Journal sa spasyłkaj na krynicy ŭ vyviedcy zachodnich krain paviedamlała, što Pryhožyn padčas buntu płanavaŭ zachapić Šajhu i Hierasimava.
Ciapier čytajuć
Prateže łukašenkaŭskaha favaryta Baskava buduje akademiju ŭ Brazilii i Ńju-Vasiuki suśvietnaha maštabu2
Kamientary