Мінабароны Расіі паказала першае відэа з Герасімавым пасля бунту Прыгожына
Міністэрства абароны Расіі сёння паказала відэа з начальнікам Генштаба і камандуючым Аб'яднанай групоўкай войскаў у зоне баявых дзеянняў на тэрыторыі Украіны Валерыем Герасімавым. Гэта першае з'яўленне генерала на публіцы пасля бунту ПВК «Вагнер» 23-24 чэрвеня і паведамленняў аб адхіленні Герасімава, якія з'явіліся ў медыя напярэдадні.
Сцвярджаецца, што нарада прайшла пасля спроб УСУ ударыць ракетамі С-200 па аб'ектах у анексаваным Крыме, Растоўскай і Калужскай абласцях 9 ліпеня, піша Руская служба «Радыё Свабода».
На відэа, апублікаваным Мінабароны, Герасімаў заслухаў даклад начальніка Галоўнага штаба ПКС Віктара Афзалава.
Пры гэтым у кадры адсутнічаў галоўнакамандуючы ПКС Сяргей Суравікін. Генерал таксама не сядзеў у прэзідыуме разам з Герасімавым, хоць з'яўляецца ягоным намеснікам у кіраўніцтве групоўкай расійскіх войскаў ва Украіне.
Пасля няўдалага бунту кіраўніка ПВК «Вагнер» Яўгена Прыгожына распаўсюджваюцца розныя чуткі пра месцазнаходжанне Суравікіна, у прыватнасці, што ён мог быць арыштаваны. Паводле іншых звестак, яго дапыталі і адпусцілі. Афіцыйна пра лёс намесніка камандуючага групоўкай расійскіх войскаў ва Украіне не паведамлялася.
Напярэдадні брытанская газета Daily Mail, спасылаючыся на свае крыніцы ў Расіі, пісала, што Герасімаў адхілены ад сваіх абавязкаў. Паводле версіі выдання, пасля бунту Яўгена Прыгожына і вяртання вызваленых з расійскага палону камандзіраў палка «Азоў» з Турцыі ва Украіну Герасімава нібыта замяніў камандуючы ПДВ генерал-палкоўнік Міхаіл Цяплінскі.
23 чэрвеня стваральнік ПВК «Вагнер» Яўген Прыгожын паведаміў пра нібыта нанесеныя па тылах «Вагнера» ракетныя ўдары з боку рэгулярнага войска Расіі. Пасля гэтага ён абвясціў, што 25 тысяч байцоў «Вагнера» адпраўляюцца ва ўзброены паход на Маскву, каб прыцягнуць да адказнасці кіраўніцтва Міністэрства абароны Расіі, а канкрэтна міністра абароны Сяргея Шайгу і кіраўніка Генштаба Валерыя Герасімава. The Wall Street Journal са спасылкай на крыніцы ў выведцы заходніх краін паведамляла, што Прыгожын падчас бунту планаваў захапіць Шайгу і Герасімава.
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары