Łukašenka: «Jeŭropa straciła suvierenitet, bo admoviłasia ad tannych enierhanośbitaŭ z Rasii». Ekanamist krasamoŭna adkazaŭ na heta i nahadaŭ pra haspadara bienzakałonki
Alaksandr Łukašenka aburyŭsia, što jeŭrapiejcy paprakajuć jaho ŭ stracie suvierenitetu, a sami kuplajuć enierhanośbity ŭtraja daražej. «Suvierenitet u ekanomicy — heta mahčymaść myślić nie łohikaj kalifa na hadzinu», — kamientuje ŭ adkaz ekanamist Dźmitryj Kruk.
Siońnia na sustrečy ź ministrami zamiežnych spraŭ dziaržaŭ — členaŭ ADKB Łukašenka zajaviŭ:
«Jany, jeŭrapiejcy, paprakajuć vas (i mianie ŭ tym liku), što my suvierenitet tut hublajem i hetak dalej. Dy Haspodź z vami! Vy daŭno jaho ŭžo stracili. Jak možna acanić i jak možna stavicca da taho, što jany admovilisia ad tannych enierhanośbitaŭ z Rasii i biaruć u 3-5 razoŭ daražej? Heta što takoje?
Nachilili, u patrebnaje miesca šyła ŭstavili i zastałosia zusim niašmat, kab jany pavalilisia i valalisia na ziamli, i jany jašče paprakajuć kahości ŭ stracie suvierenitetu! Jakoha suvierenitetu?»
Papulisckija zajavy Łukašenki prakamientavaŭ dla «Našaj Nivy» ekanamist Dźmitryj Kruk. Jon razvažaje pra toje, što nasamreč harantuje suvierenitet ekanomicy:
«Mahčymaść štości adchapić chutka i tanna naŭrad ci moža navat u samym śpiekulatyŭnym zapale mieć štości ahulnaje z suvierenitetam.
Suvierenitet u ekanomicy — heta, pierš za ŭsie, mahčymaść pa svaim mierkavańni abirać šlach raźvićcia krainy, zachoŭvajučy jak maha bolej instrumientaŭ (stupieniaŭ svabody) dla hetaha i karystacca hetymi instrumientami.
Suvierenitet u ekanomicy — heta taksama mahčymaść myślić nie łohikaj kalifa na hadzinu, a-la «nie da žyru, być by žyvu» i «paśla nas choć patop», a myślić ab budučyni krainy praciahłym haryzontam času.
U hetym rečyščy krainy Jeŭropy śviadoma adychodziać ad zaležnaści ad bienzakałonki, haspadar jakoj — varjat pa mierkach siońniašniaha śvietu, niahledziačy na toje, što pakul jaho haz / bienzin niejki čas moža być tańniejšy (što miž inšym daloka nie fakt).
Pradkazalnaść, razumieńnie partniora i davier da jaho ŭ kantekście ekanamičnaha suvierenitetu — našmat bolš važnyja rečy, čym biahučaja cana. Mienavita tamu krainy, jakija myślać takimi katehoryjami, zastajucca suvierennymi i ŭstojliva raźvivajucca bolš za 200 hadoŭ. A tyja, chto pastaviŭ na nizkija ceny na enierhanośbity, pa ŭsich bazavych ekanamičnych pakazčykach pierastali raźvivacca apošnija minimum 10 hadoŭ i ŭsio bolš adstajuć ad «niedalnabačnych» susiedziaŭ.
Bolš za toje, u vyniku atrymałasia takaja tatalnaja zaležnaść ad haspadara bienzakałonki, što vieści ŭsurjoz havorku pra paŭnavartasny ekanamičny suvierenitet stanam na siońnia niemahčyma».
Kamientary