Rasijanie ŭ rajonie Bachmuta akazalisia ŭ niebiaśpiečnym stanoviščy — ISW
Amierykanski instytut vyvučeńnia vajny (ISW) u čarhovaj zvodcy adznačaje, što rasijskija ŭzbrojenyja farmavańni, uziaŭšy Bachmut, apynulisia tam u niebiaśpiečnym stanoviščy — ale rasijskaja prapahanda i vajskovyja błohiery amal nie raspaviadajuć pra heta, a śviatkujuć pieramohu.
Apisaŭšy sprečki rasijan pra toje, kaho i jak treba ŭznaharodžvać za ŭziaćcie Bachmuta, analityki ISW nahadvajuć ab faktyčnym stanoviščy spraŭ, jak jano im bačycca.
«Pierabolšanaja ŭvaha da zajavaŭ ab pieramozie ŭ Bachmucie adciahvaje ŭvahu ad taho chistkaha stanovišča, u jakim akazalisia rasijskija vajskoŭcy ŭ Bachmucie i vakoł jaho […] Rasijskija vajskoŭcy ŭ Bachmucie znachodziacca va ŭraźlivym stanoviščy asabliva tamu, što ich nastup u hetym rajonie, chutčej za ŭsio, vydychsia, a heta daje ŭkrainskaj armii mahčymaść dla novych kontratak na ŭžo asłablenyja fłanhi la Bachmuta», — piša ISW.
Dadatkovuju ryzyku, z punktu hledžańnia ISW, pradstaŭlaje i abvieščany zasnavalnikam PVK «Vahnier» Jaŭhienam Pryhožynym vyvad jaho častak z Bachmuta ŭ tył na praciahu niekalkich dzion.
Ministerstvu abarony Rasii ŭ vypadku sychodu «vahnieraŭcaŭ», mahčyma, pryjdziecca zatykać hety ŭčastak drenna navučanymi i ekipavanymi zvyčajnymi častkami — takimi ž, jakija tolki što, u mai, adstupali na fłanhach na poŭnač i poŭdzień ad horada.
Pry hetym u rasijskaj infarmacyjnaj prastory hetaja niebiaśpieka ŭ asnoŭnym ihnarujecca, piša Bi-bi-si.
U svaju čarhu, amierykanskaja hazieta New York Times, pierakazvajučy mierkavańni vajskovych ekspertaŭ ab uziaćci rasijanami Bachmuta, nazyvaje jaho «piravaj pieramohaj», jakaja nijak nie nablizić rasijskuju armiju da zajaŭlenaj mety — zachopu ŭsioj terytoryi Danieckaj vobłaści.
«Kali adkinuć palityku i simvaličnaje značeńnie ŭziaćcia Bachmuta, ekśpierty kažuć, Maskva naŭrad ci zmoža kanviertavać zavajovu razhromlenaha horada ŭ dalejšaje prasoŭvańnie da kančatkovaj mety spadara Pucina — zachopu ŭsiaho Danbasa», — piša NYT.
«Horad […] ujaŭlaje saboj u asnoŭnym hrudu ruin, biez elektryčnaści, vady i ŭsiaho inšaha, što treba dla akupacyjnych častak, i nie moža słužyć bazaj dla dalejšaha nastupu na ŭkrainskuju terytoryju. Ukrainskaja armija adstupiła na značna bolš zručnyja abarončyja linii na vyšyniach za horadam», — adznačajuć aŭtary haziety.
Akramia taho, śledam za vajennymi ekśpiertami NYT adznačaje, što rasijanie panieśli ŭ šmatmiesiačnym šturmie Bachmuta surjoznyja straty — choć pamier dakładna nie viadomy.
Straty byli z abodvuch bakoŭ, i da ŭkrainskaha kamandavańnia, jak nahadvaje hazieta, taksama jość šmat pytańniaŭ — i ŭnutry krainy, i ŭ zachodnich vajennych ekśpiertaŭ: ci varta było hublać stolki sałdat u vuličnych bajach, marnavać stolki bojeprypasaŭ, zamiest taho, kab adyści na bolš zručnyja linii abarony.
Bližejšym časam buduć vyzvaleny bolš za 150 palitźniavolenych39
Kamientary