Alijeŭ nazvaŭ terarystyčnym aktam ataku iranskich dronaŭ pa Nachičevani
Prezident Azierbajdžana pravioŭ siońnia pasiadžeńnie Rady biaśpieki.
«Azierbajdžanskaja dziaržava rašuča asudžaje hety ahidny terarystyčny akt, i vinavatyja pavinny być nieadkładna pryciahnuty da adkaznaści», — zajaviŭ Ilcham Alijeŭ.
Jon dadaŭ, što Iran pavinien dać tłumačeńni Azierbajdžanu i prynieści prabačeńni. Alijeŭ taksama padkreśliŭ, što Azierbajdžan nie ŭdzielničaje i nie budzie ŭdzielničać u apieracyjach suprać Irana.
Tym časam Uzbrojenyja siły Irana admaŭlajuć naniasieńnie ŭdaraŭ pa terytoryi Azierbajdžana bieśpiłotnikami.
U toj ža čas pradstaŭnik MZS Irana Esmaił Bahai paćvierdziŭ zajavy Tehierana pra toje, što Iran nie zapuskaŭ rakietu, pierachoplenuju napiaredadni ŭ pavietranaj prastory Turcyi. Pra heta jon skazaŭ ispanskamu telekanału TVE.
U čaćvier MZS Azierbajdžana zajaviła, što pa horadzie Nachičevań u azierbajdžanskim ekskłavie z terytoryi Irana byli naniesieny ŭdary dronami, u vyniku čaho paciarpieli dva čałavieki (azierbajdžanskija ŚMI paviedamlajuć pra čatyroch paciarpiełych).
«Adzin bieśpiłotnik upaŭ na budynak terminała aeraporta», druhi — «pobač z budynkam škoły ŭ vioscy Šiekierabad», havaryłasia ŭ zajavie. Ministerstva abarony Azierbajdžana zajaviła, što «akty ahresii nie zastanucca biez adkazu».
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary