Premjer-ministr Nikoł Pašynian ličyć, što ADKB sychodzić z Armienii. Pra heta jon zajaviŭ na siońniašniaj pres-kanfierencyi, piša reform.by.
«Kali hienieralny sakratar ADKB naviedaŭ Armieniju ŭ 2020 hodzie, jon mnie ŭ hutarcy skazaŭ, što ŭ ADKB jość bojaź, što Respublika Armienija vyjdzie z ADKB. Ja skazaŭ hiensieku, što zakłapočanaść niedarečnaja. Darečy inšaje — zakłapočanaść nakont taho, što ADKB sama sydzie z Armienii. I pa majoj acency, ADKB, žadajučy taho ci nie, vychodzić z Armienii, i heta niepakoić nas», — skazaŭ Pašynian.
Niadaŭna Armienija apaviaściła ADKB, što admaŭlajecca ad svajoj kvoty na pasadu namieśnika hienieralnaha sakratara arhanizacyi. Pašynian siońnia rastłumačyŭ, što kraina hatovaja nakiravać svajho pradstaŭnika, kali budzie ŭpeŭnienaja, što heta ŭmacuje jaje biaśpieku.
«My daŭno i paśladoŭna pracavali z ADKB i praciahvajem pracavać. My prapanavali svaje pryncypy, jakija tyčacca nie Respubliki Armienija, a taho, dziejničaje ADKB ci nie, isnuje jana ci nie, prynamsi, na terytoryi Respubliki Armienija. My hatovyja vyrašyć hetuju prablemu», — dadaŭ jon.
Premjer-ministr Armienii taksama papiaredziŭ, što ciapier vysokaja vierahodnaść eskałacyi na miažy z Azierbajdžanam, a taksama ŭ Nahornym Karabachu. Adkaznaść za jaje jon uskłaŭ na Baku.
«Maja vysnova źviazanaja z usio bolš ahresiŭnaj rytorykaj Azierbajdžana i, viadoma, jość niekatoryja inšyja źviestki», — dadaŭ jon.
Pašynian adznačyŭ peŭnuju dynamiku pa mirnym dahavory z Azierbajdžanam, ale, na jaho dumku, fundamientalnyja prablemy z prajektam zastajucca. Premjer-ministr Armienii zajaviŭ, što Azierbajdžan sprabuje sfarmulavać terytaryjalnyja pretenzii ŭ dačynieńni da jaho krainy, a taksama de-fakta atrymać sankcyju na etničnyja čystki ŭ Nahornym Karabachu.
Kamientary