«Što zdaryłasia — niezrazumieła». Zahinuŭ 32-hadovy navukoviec Alaksiej Klackoŭ
Talenavitaha navukoŭca nie stała 5 studzienia.
Zahinuŭ Alaksiej Klackoŭ u Varšavie. Znajomyja pakul nie mohuć raskryć detali. «Što zdaryłasia — niezrazumieła. Idzie palicejskaje rasśledavańnie», — adznačyli jany ŭ razmovie z «Našaj Nivaj».
Pra śmierć navukoŭca raniej paviedamiŭ kaleha pa pracy ŭ Nacyjanalnaj akademii navuk Siarhiej Biesarab.
«Adzin z samych talenavitych biełaruskich chimikaŭ-arhanikaŭ. Spartyŭny turyst, fatohraf, techničny erudyt i vučony, cudoŭny chimik i abaviazkova — sapraŭdny Biełarus», — napisaŭ jon pra Klackova.
Alaksiej — vypusknik chimičnaha fakulteta Biełaruskaha dziaržaŭnaha ŭniviersiteta. Jon skončyŭ Instytut padrychtoŭki kadraŭ Nacyjanalnaj akademii navuk. Pracavaŭ u akademičnym Instytucie fizika-arhaničnaj chimii, u jakim taksama advučyŭsia.
Śpiecyjalizavaŭsia na arhaničnaj chimii, sintezie bijałahična aktyŭnych hieteracykličnych złučeńniaŭ. U 2016 hodzie byŭ łaŭreatam prezidenckaj stypiendyi dla aśpirantaŭ, a ŭ 2017 hodzie staŭ kandydatam chimičnych navuk.
Alaksiej Klackoŭ administravaŭ prajekt, u vyniku jakoha byli sintezavanyja dabaŭki, zdolnyja pavyšać efiektyŭnaść bijałahična aktyŭnych rečyvaŭ, u tym liku preparataŭ suprać raku.
«Kali ŭdasca źnizić normy raschodu procipuchlinnych preparataŭ, kancentracyju, pry jakoj nadychodzić terapieŭtyčny efiekt, to budzie pavyšacca ŭzrovień žyćcia chvorych padčas terapii», — adznačaŭ navukoviec.
Alaksiej Klackoŭ byŭ aŭtaram mnostva publikacyjaŭ u navukovych vydańniach. Jaho kalehi kažuć, što nieŭzabavie pa abaronie kandydackaj dysiertacyi jon źjechaŭ u Rasiju, dzie pracavaŭ va ŭniviersitecie siabroŭstva narodaŭ imia Patrysa Łumumby.
Alaksiej Klackoŭ pieražyvaŭ za toje, što adbyvałasia na radzimie ŭ 2020 hodzie. U adnym z pastoŭ u fejsbuku jon napisaŭ:
«Ličycie mianie biełarusam» — heta vykazvańnie pryznańnia ŭsim, chto padtrymlivaje krainu ŭ važny adcinak jaje historyi».
Što stała pryčynaj pierajezdu Alaksieja Klackova ŭ Jeŭropu, dakładna nieviadoma. U 2022 hodzie jon užo pracavaŭ u Varšaŭskim univiersitecie.
Siarhiej Biesarab piša, što apošnim časam Alaksiej aktyŭna zajmaŭsia «nobieleŭskanosnaj» klik-chimijaj, i ŭ jaho było šmat płanaŭ.
«Niezamiennaja strata dla Biełarusi i biełaruskaj chimičnaj navuki. Kolki jon moh by jašče ŭsiaho zrabić, adkryć i vynajści», — adznačaje jon.
14 studzienia Alaksieju Klackovu miełasia spoŭnicca 33 hady.
«Naša Niva» — bastyjon biełaruščyny
PADTRYMAĆCiapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary