Štodzionnaje spažyvańnie adnoj i toj ža ježy moža vyklikać depresiju
Internet-partał Well+Good raspaviadaje pra toje, jak charčavańnie moža paŭpłyvać na zdaroŭje — nie zaŭsiody dobra.
Sučasny śviet naviazvaje chutki temp žyćcia i prymušaje pracavać na vysokich abarotach.
Jeści dobra pryhatavanuju ježu dla mnohich sapraŭdnaje zadavalnieńnie. Ale luboje hatavańnie patrabuje času.
«Voś čamu my tak časta idziom bolš lohkim šlacham i vybirajem biaśpiečnyja i pravieranyja varyjanty. Časam my baimsia ekśpierymientavać, a moža, prosta nie paśpiavajem pradumać śpis praduktaŭ, jakija źbirajemsia kupić. Pradukty i stravy, jakija možna lohka i chutka pryhatavać, jak praviła, majuć abmiežavanuju pažyŭnuju kaštoŭnaść, tamu što jany nakiravany na nieadkładnaje zadavalnieńnie spažyŭca. Tamu varta pamiatać pra padychod da kupli ježy z rozumam i pra palapšeńnie svaich zvyčak charčavańnia», — raspaviadaje ŭ svaim artykule partał Well+Good.
Uviadzieńnie peŭnaha režymu charčavańnia zusim nie pavinna ŭsprymacca niehatyŭna, kali jano datyčyć, naprykład, rehularnaści pryjomu ježy ŭ peŭny čas dnia. Admova ad śniadanku, abiedu ci viačery i niezbałansavanaje charčavańnie — jašče adna biada sučasnaści. Charčavańnie ŭ adzin i toj ža čas rehuluje rytm pracy arhanizma i palahčaje praciakańnie niekatorych bijachimičnych pracesaŭ.
Moža zdacca, što ŭžyvańnie adnych i tych ža karysnych straŭ dobra ŭpłyvaje na arhanizm i zabiaśpiečvaje štodzionnyja patreby ŭ enierhii i charčavańni, ale heta zusim nie tak.
Amierykanski hastraenterołah Uił Busievič — aŭtar knihi «Zdaroŭje, enierhija, lohkaść» — u intervju Well+Good śćviardžaje, što «lepšy sposab zachavać zdaroŭje i mikrafłoru kišečnika — heta raznastajnaść raślinnaj ježy, jakuju my spažyvajem».
«Užyvańnie ŭ ježu adnych i tych ža karysnych praduktaŭ kožny dzień moža zadavolić našy patreby ŭ charčavańni, ale nie paŭpłyvaje na raznastajnaść mikrafłory kišečnika», — padkreślivaje Busievič.
Taksama jon dadaje, što dla palapšeńnia pracy kišečnika rekamiendujecca ŭžyvać 30 roznych praduktaŭ raślinnaha pachodžańnia na tydzień.
«Heta kolkaść na pieršy pohlad zdajecca vielmi vialikaj, ale, uličvajučy ŭsie isnujučyja vidy harodniny, sadaviny, arechaŭ, zbožža i śpiecyj, to heta nie tak i składana», — zapeŭnivaje jon.
Kab paćvierdzić takoje mierkavańnie brytanski epidemijołah Cim Śpiektar pravioŭ ekśpierymient, padčas jakoha jaho syn jeŭ 10 dzion zapar fastfud z Mcdonald's. Hety test pavinien byŭ pravieryć, jak pastajannaje ŭžyvańnie niezdarovaj ježy paŭpłyvaje na jaho arhanizm.
Jak paviedamlaje partał Well+Good, užo praz čatyry dni ekśpierymienta źjavilisia pieršyja niehatyŭnyja źmieny ŭ stanie zdaroŭja chłopčyka. Jon vyhladaŭ blednym, mlavym i apatyčnym. Test na raznastajnaść mikrafłory kišečnika pakazaŭ, što ŭžo za čatyry dni spažyvańnia takoj niezdarovaj ježy jon straciŭ ad 30 da 40 adsotkaŭ raznastajnaj bakteryjalnaj mikrafłory.
«Ekśpierymient doktara Śpiektara dakazaŭ, što ŭžyvańnie adnych i tych ža praduktaŭ razburalna ŭpłyvaje na arhanizm čałavieka. Adsutnaść raznastajnaści ŭ karotkaterminovaj pierśpiektyvie źnižaje ŭzrovień enierhii, vyklikaje zaciamnieńnie mozha, abciažarvaje stravavańnie i razburaje imunnuju sistemu, tamu pavyšaje ŭsprymalnaść da lubych zachvorvańniaŭ. Doŭhaterminovyja efiekty ŭklučajuć pavyšanuju ryzyku raźvićcia depresii, chvaroby Alchiejmiera i roznych vidaŭ raku», — piša Well+Good.
Niekatoryja ludzi ličać, što, užyvajučy peŭnyja pradukty z adpaviednaj častatoj, jany pryvykajuć da ich. Cim Śpiektar śćviardžaje, što ŭ hetym vypadku treba zaŭsiody prysłuchoŭvacca da svajho arhanizma.
«Kali my adčuvajem, što niejkaha praduktu nam nie chočacca, to nie pichajcie jaho ŭ siabie siłkom», — padahulniaje jon.
Voś šerah prostych sposabaŭ i parad, jak zrabić raznastajnym svajo charčavańnie.
- Kali ŭ vas jość lubimyja stravy, jakija vy jaście časta, to pieryjadyčna mianiajcie pradukty. Mučnyja vyraby, bahatyja na vuhlavody, možna lohka zamianiać na bolš karysnyja. Zamiest pšaničnaha chleba ci makarony ź miakkich hatunkaŭ pšanicy spažyvajcie celnaziernievyja, a zamiest biełaha rysu — karyčnievy. Adzin i toj ža nabor harodniny na kožny dzień taksama možna zrabić bolš raznastajnym, naprykład, zamianiŭšy sałatu i ahurki, u jakich šmat vady, na brokali abo kviacistuju kapustu.
- Dadavajcie ŭ ježu babovyja, tamu što jany majuć šmat karysnaha białku. Da zvyčajnaha bałonskaha sousu možna dadać fasolu, jakaja značna ŭzbahacić pažyŭnuju kaštoŭnaść ježy. Babovyja pavinny być asnoŭnym praduktam u racyjonie viehanaŭ i viehietaryjancaŭ.
- Nie zabyvajcie pra ŭklučeńnie ŭ vaš racyjon karysnych tłuščaŭ. Jany palahčajuć zasvajeńnie takich vitaminaŭ, jak A, D i E. Vam prosta treba dadać arechi, siemiečki abo avakada ŭ niekatoryja stravy.
- A sałodkaje treba pieramiažać z sadavinoj, jakaja ŭzbahacić desierty vitaminami.
Čytajcie jašče:
Recept na vychadnyja. Aładki z ananasami: niezvyčajnaja strava, dzieciam spadabajecca
Nikoli nie zamarožvajcie smažanaha. Voś čamu
Jakija hłazuravanyja syrki samyja smačnyja: biełaruskija ci zamiežnyja? Voś što pakazała dehustacyja ŭślapuju
Ciapier čytajuć
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary