Žonka palitźniavolenaha žurnalista Dzianisa Ivašyna raskazała ab pravakacyjach suprać jaje muža. Pavodle jaje słoŭ, u chod iduć jak fizičnyja, tak i infarmacyjnyja mietady cisku.
Adzin z kolišnich viaźniaŭ haradzienskaj turmy, mastak i rok-muzyka Pavał Bialanaŭ, jaki ciapier na voli, paćvierdziŭ sproby pravakacyj u dačynieńni Dzianisa Ivašyna z boku supracoŭnikaŭ turmy, napisała Volha Ivašyna.
«Mahčyma, niaŭdałuju fizičnuju pravakacyju vyrašyli zamianić infarmacyjnaj. Mahčyma, jany prosta nie viedajuć, što adrozna ad złačyncaŭ i pravakataraŭ, nam niama čaho chavać. Pavał Bialanaŭ raskazaŭ, što byŭ za dźvie kamiery ad Dzianisa, jaki, u svaju čarhu, peŭny čas siadzieŭ z Valeryjem Trockim — jaho taksama abvinavačvajuć u «dziaržzdradzie» dy jašče niečym. Vidavočna, čekisty pa svaich starych mietadyčkach spadziavalisia, što chłopcy pačnuć abmiarkoŭvać «spravy» i vydaduć niejkuju infarmacyju».
Volha Ivašyna padkreśliła, što fiksuje nie tolki naŭprostavyja ździeki i katavańni ŭ dačynieńni muža, a navat takija sproby. Z padačy Paŭła Bialanava siamja atrymała infarmacyju, što nieadnarazova Dzianisa sprabavali skampramietavać, pieravodzili ŭ kamieru ź ludźmi, u jakich za kratami nizki sacyjalny status. Adnak, praciahvaje jana, jaje muž davoli chutka adaptujecca da źniešnich umoŭ, vyvučaje ŭnutranyja praviły i tradycyi, a tamu zrabiŭ toje, što robiać viaźni ŭ padobnych umovach: zapatrabavaŭ ad achoŭnikaŭ pieravieści jaho ŭ inšuju kamieru — bo inakš fizična naškodzić sabie, parezaŭšy vieny.
21 śniežnia padčas spatkańnia z maci heta paćvierdziŭ sam Dzianis, nahadaŭšy, što takim čynam musili «vyrašać prablemu» palitviaźni Pavał Sieviaryniec, Mikoła Statkievič, Ihar Bancar dy inšyja. U vyniku turemniki prapanavali žurnalistu «alternatyvu» — karcar. Dzie toj i adbyŭ u «marazilniku» 10 sutak.
Dzianisa Ivašyna asudzili na 13 hadoŭ i 1 miesiac kałonii ŭzmocnienaha režymu. Taksama jaho aštrafavali na 4800 rubloŭ. Jašče Ivašyn musić vypłacić kampiensacyju maralnaj škody dzieviaci paciarpiełym — pa 2000 rubloŭ kožnamu. Chto hetyja paciarpiełyja, nieviadoma, bo sud prachodziŭ u zakrytym režymie.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1313
Kamientary