Kino na vychodnych

Djabał z naftalinu

U kinaprakacie – praciah i paŭtor klasyčnych stužak Ryčarda Donera. «Viartańnie Supermena» dy «Omen 666».

«Viartańnie Supermena» («Superman Returns»)

ZŠA–Aŭstralija, 2006, kalarovy, 154 chv.

Žanr: kinakomiks

Adznaka: 4 (z 10)

Paśla šaścihadovych vandrovak pa kosmasie Supermen viartajecca na Ziamlu. Kinutaja kachanka Łois Łejn adpomściła artykułam «Čamu Supermen niepatrebny?» dyj naładziła asabistaje žyćcio, bartanuŭšy mužčynu svajoj mary. I tolki niahodnik Leks Luter pamiataje pra byłoha voraha. Łysy intryhan kradzie kryštali planety Krypton i pahražaje cełamu śvietu...

Stvaralniki «Viartańnia» jaŭna nia viedajuć, što rabić z adrodžanym Supermenam. Viałyja siamiejnyja prablemy z tajemnym kachańniem i dziciom-astmatykam, urazdrob – pryhody j vyratavańni i nieprychavana chałturny Kievin Spejsi ŭ roli kinaniahodnika. Hlamurny Brendan Rut u błakitnym kaściumčyku nia maje charyzmy kolišniaha Supermena – Krystafera Ryva. A kali superhieroj paŭtaraje podźvih Zasnułaje pryhažuni – heta vyhladaje na ździek.

Režysura Brajana Synhiera («Ludzi- Ch») – apatyčna-kamercyjnaja: katastrofy samalota, žanočy visk i Marłon Brando vyłučajucca. Siarod reanimavanych masak Marłon Brando – samy žyvy. Supermenaŭ tata ściahnuty z vykinutych narezak papiarednich filmaŭ. Pamierły Brando pratestavać nia moh.

Usio ž scenarnyja prydumki karciny sastupajuć trešavym lapam «Biełaruśfilmu»: vialikija hrošy dazvalajuć zrabić cukierku ź luboj syraviny.

❏

«Omen 666» («Omen»)

ZŠA, 2006, kalarovy, 110 chv.

Žanr: mistyka

Adznaka: 3,5 (z 10)

Žonka amerykanskaha dyplamata pieraniesła ciažkija rody. Dzicia skanała, i muž upotajki ŭziaŭ na vychavańnie chłopčyka, jakoha vydaŭ za svajho syna. Praź piać hadoŭ dyplamat pačynaje padazravać, što jaho syn – antychryst.

Karcina Džona Mura amal nie adstupaje ad aryhinału Ryčarda Donera. Čorny sabaka-achoŭnik, niańka-satanistka (Mija Feroŭ sa zvyčkami Šapaklak), źlakanyja małpy, adsiečanaja hałava. Jak i ŭ karcinie 30-hadovaj daŭniny, syn djabła źniščaje ludziej na svaim šlachu – i maje aniolski vyhlad dziciaci.

Ale zusim nia strašna. Džon Mur pužaje rezkimi hukami j źmienaju planaŭ, što dobra viadoma ź japonskich žachavak. Najbolšy kašmar filmu – ihra Liva Šrajbera (dyplamata Torna). Adsutnaść aktorstva niazhrabna kampensujuć zakadravymi hrymotami. Daremna.

Sprava nia tolki ŭ talentach, sam čas źmianiŭsia.

• 0
• 0
• 0
• 0
• 0
• 0
• 0
• 0