Rassłablacca ni ŭ jakim vypadku nie varta: nas čakaje trydemija — mikst adrazu niekalkich štamaŭ.
Pra heta papiaredžvaje zahadčyk kafiedry infiekcyjnych chvarob BDMU, člen-karespandent NAN Biełarusi, doktar miedycynskich navuk, prafiesar, hałoŭny pazaštatny śpiecyjalist pa infiekcyjnych zachvorvańniach Ministerstva achovy zdaroŭja Ihar Karpaŭ, piša «Narodnaja vola».
«Pandemija COVID-19 jašče nie skončyłasia, — havoryć aŭtarytetny biełaruski doktar. — My, musić, užo nie ŭ epicentry, ale i kanca jašče nie vidać».
Na minułym tydni kolkaść vypadkaŭ COVID-19 uzrastała ŭ niekatorych rehijonach śvietu. Heta vyklikana spałučeńniem faktaraŭ: cyrkulacyjaj varyjanta «amikron» i jaho padvaryjanta BA.5, a taksama paŭsiudnym źnižeńniem mier abarony i nakiravanych namahańniaŭ hramadskaj achovy zdaroŭja.
Źviartaje na siabie ŭvahu novy padvaryjant COVID-19 — XBB (Gryphon), chvala jakoha pačałasia ŭ Sinhapury, a taksama jašče adzin — BQ.1.1 (Cerberus), bolš raspaŭsiudžany ŭ Jeŭropie i ZŠA. Jany nie charaktaryzujucca pavieličeńniem śmiarotnaści i virulentnaści, ale pry hetym bolš kantahijoznyja.
Taksama ŭ śviecie źjaviŭsia novy termin — trydemija. Trajny mikst (COVID-19, hryp i reśpiratorna-sincycyjalny virus) — toje, z čym užo sutyknulisia ŭ ZŠA. Heta stvaraje dadatkovuju nahruzku nie tolki na ambułatornuju, ale i na špitalnuju sietku, asabliva pry limitavanaj kolkaści stacyjanarnych łožkaŭ.
Adbyŭsia niečakana rańni pačatak siezonnaha ŭzdymu hrypu ŭ ZŠA. Zvyčajna hety virus prychodzić u krainu ŭ pačatku śniežnia. Uskosna ŭsio heta śviedčyć pra toje, što i ŭ nas moža być źmiena daminantnaha reśpiratornaha virusa. Heta značyć, my taksama nie paźbiehniem surjoznaha ŭzdymu zachvorvańniaŭ na hryp.
Adznačajecca taksama značnaje pavieličeńnie kolkaści vypadkaŭ reśpiratorna-sincycyjalnaha virusa, asabliva ŭ pažyłych ludziej i ŭ dziaciej da 2 hadoŭ. Z hetych pazicyj cikavymi ŭjaŭlajucca apisańni hibrydnych virusnych čaścic (hryp i RSV), jakija źjavilisia ŭ navukovaj litaratury i chutčej pranikajuć u lohačnuju tkanku.
U hrupie ryzyki tyja pacyjenty, što i raniej: pažyłyja ludzi z surjoznymi fonavymi zachvorvańniami, imunadepresijaj. Ciapier praktyčna ŭsie ciažkija formy zachvorvańnia i ŭsia śmiarotnaść źviazany abo ź ciažkaj samatykaj pacyjentaŭ, abo z uzrostavaj imunadepresijaj.
Jašče raz chočacca paŭtaryć toje, pra što havorycca bolš za dva hady: nieabchodna adkazna, bieražliva i ŭvažliva stavicca da pažyłych!
Varta źviarnuć uvahu na dva lekavyja srodki, jakija jość u našym arsienale i vałodajuć dakazanaj efiektyŭnaściu. Pieršy ź ich — nirmatrełvir + rytanavir (u našaj aptečnaj sietcy pradajecca pad nazvaj skajvira). Prymajecca ŭnutr. Hety preparat značna źmianšaje vierahodnaść ciažkich uskładnieńniaŭ i pryznačany ŭ pieršuju čarhu dla pacyjentaŭ z fonavymi zachvorvańniami i pažyłych ludziej na pačatku chvaroby.
Pacyjentam z hrup ryzyki, jakija chvarejuć na COVID-19, metazhodna zabiaśpiečyć rańniaje ŭviadzieńnie remdesiviru, jaki taksama vałodaje dakazanym efiektam. Pa śviedčańniach, pryznačajecca ŭnutryvienna. Takaja mahčymaść jość va ŭsich ustanovach, i joj treba karystacca. Dla pažyłych ludziej heta dobry šanc na stabilizacyju stanu».
Pavodle słoŭ Karpava, jak nikoli aktualnaja vakcynacyja suprać hrypu. Treba być hatovymi da istotnaj roli hrypoznaj infiekcyi ŭ hetym siezonie, vierahodna, bolš rańnim, čym zvyčajna.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam3
Kamientary