Navukoŭcy častkova adnavili pracu serca i mozhu śvińni praz hadzinu paśla jaje śmierci
Navukoŭcy ź Jelskaj škoły miedycyny pry dapamozie raspracavanaj imi technałohii OrganEx adnavili krovazvarot i kletkavuju aktyŭnaść žyćciova važnych unutranych orhanaŭ śviniej, takich jak serca i mozh, praz hadzinu paśla śmierci žyvioł. Praca bijołahaŭ apublikavanaja ŭ časopisie Nature, redakcyja jakoha taksama koratka pierakazała artykuł navukoŭcaŭ.
U chodzie ekśpierymientu daśledčyki padklučali śviniej, u jakich było štučna vyklikana spynieńnie serca, da sistemy pierfuzii, — taja prapampoŭvała praz kryvianosnyja sasudy žyvioł śpiecyjalny rastvor, jaki źmiaščaje pierš za ŭsio kroŭ žyvioł, a taksama śpiecyjalny sastaŭ z 13 złučeńniaŭ, pryznačanych dla adnaŭleńnia kletkavaj žyćciadziejnaści. U pryvatnaści, u skład rastvora ŭvachodzili antykaahulanty — rečyvy, jakija błakujuć zhortvańnie kryvi, i pieranosčyk kisłarodu, «štučny» hiemahłabin Hemopure.
U vyniku prapampoŭki rastvora da tkanak žyvioł staŭ pastupać kisłarod, paśla čaho niekatoryja funkcyi ich orhanaŭ, — takija jak skaračeńnie serca i aktyŭnaść piačonki i nyrak, — chutka adnavilisia. U kantrolnych hrupach hetaha nie adbyłosia. Tolki ŭ ekśpierymientalnaj hrupie tkanki žyvioł nie byli paškodžanyja doŭhim kisłarodnym haładańniem.
Novaja technałohija dazvoliła zachavać celnaść niekatorych tkanak mozhu, ale pry hetym aŭtary pracy nie ŭbačyli nijakaj skaardynavanaj mazhavoj aktyŭnaści, jakaja śviedčyła b pra adnaŭleńnie mazhavoj dziejnaści. Akramia taho, serca nie było całkam adnoŭlenaje.
Aŭtary daśledavańnia padkreślivajuć, što, uličvajučy adsutnaść narmalnaj elektryčnaj aktyŭnaści mozhu, havorka ŭ hetym vypadku nie idzie pra reanimavańnie śvińni paśla śmierci — a tolki pra zachavańnie žyćciadziejnaści tkanak. «My prymusili kletki rabić toje, na što jany nie byli zdolnyja, kali žyvioły byli miortvyja», — skazaŭ adzin z aŭtaraŭ pracy, niejrabijołah Zvanimir Ursielja.
Navukoŭcy adznačyli, što miortvyja śvińni, jakich padklučyli da sistemy OrganEx, stali mižvolna patorhvać hałavoj, šyjaj i tułavam paśla ŭviadzieńnia kantrasnaha farbavalnika ŭ mozh. Daśledčyki nie zmahli rastłumačyć hetuju źjavu, paličyŭšy małavierahodnym, što impulsy ŭźnikali ŭ hałaŭnym mozhu. Jany dapuścili, što impulsy ŭźnikali ŭ śpinnym mozhu, jaki moža kantralavać niekatoryja ruchalnyja funkcyi niezaležna ad hałaŭnoha.
Aŭtary pracy raźličvajuć, što ŭ budučyni ich technałohiju zmohuć vykarystoŭvać dla taho, kab zachoŭvać orhany dla transpłantacyi.
-
«Leha» abviaščaje revalucyju: prezientavanaja sistema, jakaja ažyŭlaje kubiki biez smartfonaŭ. Voś jak jana pracuje i kolki kaštuje
-
Mask płanuje stvaryć na kalaziamnoj arbicie sapraŭdnaje suzorje centraŭ apracoŭki danych. Rasija zaniepakojenaja
-
Apple nabyła sakretnuju izrailskuju technałohiju sčytvańnia mimiki
Ciapier čytajuć
«Na 15 chvilin vyklučyli śviatło — boža moj, z Ukrainaj paraŭnali». Łukašenka patłumačyŭ, kolki ekanomić na vuličnym aśviatleńni45
Kamientary