Bił Hiejts škaduje pra kožnuju chvilinu, praviedzienuju z Džefry Epštejnam

U intervju aŭstralijskamu telekanału 9News Hiejts skazaŭ, što ščyra prosić prabačeńnia za toje, što stasavaŭsia z Epštejnam.

«Ja škaduju pra kožnuju chvilinu, praviedzienuju ź im, i prynošu svaje prabačeńni», — skazaŭ multymiljarder.

Pavodle jaho słoŭ, tady ŭvaha była zasiarodžanaja na tym, što Epštejn mieŭ šyrokija kantakty siarod vielmi bahatych ludziej i abiacaŭ pryciahnuć ich hrošy na prajekty ŭ śfiery hłabalnaj achovy zdaroŭja. Adnak ciapier Hiejts pryznaje, što heta byŭ tupikovy šlach i surjoznaja pamyłka.

Nahodaj dla novych zajaŭ stali amal try miljony staronak dakumientaŭ, apublikavanych Ministerstvam justycyi ZŠA. Siarod ich znajšli čarnaviki listoŭ Epštejna, u jakich jon śćviardžaŭ, nibyta mieŭ z Hiejtsam blizkija i kampramietujučyja adnosiny.

Sam Hiejts kateharyčna adchilaje hetyja śćviardžeńni, padkreślivajučy, što listy nikoli nie byli adpraŭlenyja i źjaŭlajucca vydumkaj. Jon vykazaŭ mierkavańnie, što Epštejn moh naŭmysna sprabavać jaho skampramietavać.

U adnym z čarnavikoŭ 2013 hoda Epštejn abvinavačvaŭ Hiejtsa ŭ pazašlubnych suviaziach i rabiŭ šerah skandalnych zajaŭ. Pradstaŭnik Hiejtsa nazvaŭ hetyja dakumienty śviedčańniem rasčaravańnia Epštejna i jaho hatoŭnaści iści na krajnija miery, kab źniasłavić viadomaha biznesmiena.

Byłaja žonka Hiejtsa, Mielinda Frenč Hiejts, u intervju NPR pryznałasia, što publikacyja dakumientaŭ viarnuła jaje da vielmi balučych momantaŭ u šlubie. Jana adznačyła, što ŭsie niavyrašanyja pytańni pavinny tłumačyć tyja, kaho jany datyčać, u tym liku jaje były muž. Raniej Mielinda ŭžo kazała, što suviazi Hiejtsa z Epštejnam paŭpłyvali na rašeńnie ab razvodzie ź im u 2021 hodzie.

Hiejts paviedamiŭ, što ŭpieršyniu sustreŭsia z Epštejnam u 2011 hodzie, užo paśla taho, jak toj pryznaŭ vinu ŭ złačynstvach, źviazanych ź niepaŭnaletnimi. Na praciahu troch hadoŭ jon byvaŭ na viačerach ź im, ale, pavodle jaho słoŭ, nikoli nie naviedvaŭ pryvatny vostraŭ Epštejna i nie mieŭ na im seksualnych kantaktaŭ.

«Ja byŭ durniem, pravodziačy ź im čas. Ja byŭ adnym z mnohich ludziej, jakija škadujuć, što kali-niebudź viedali jaho», — kajecca Bił Hiejts.

Džefry Epštejn pamior u 2019 hodzie ŭ ńju-jorkskaj turmie, dzie znachodziŭsia pad śledstvam pa abvinavačańniach u handli ludźmi z metaj seksualnaj ekspłuatacyi. Adnak ža nivodnamu ź viadomych ludziej, zhadanych u materyjałach, aficyjnyja abvinavačańni vystaŭlenyja nie byli, i ŭsie jany admaŭlajuć svaju datyčnaść da złačynstvaŭ Epštejna.

• 1
• 0
• 9
• 3
• 0
• 0
• 0
• 0