Što pahladzieć: «Šervud» — adzin z najlepšych detektyvaŭ za apošni čas
Hetuju historyju pra maleńki horad i hučnyja zabojstvy krytyki nazyvajuć adnym z najlepšych sieryjałaŭ VVS za apošni čas. Kažuć, u «Šervudzie» jość usio, na što tolki možna spadziavacca ŭ detektyvie.
Šeść epizodaŭ «Šervuda» zasnavanyja na dvuch šakavalnych zabojstvach, jakija nasamreč adbylisia ŭ 2004 hodzie. Miesca trahiedyi — rajon Ešfiłd hrafstva Notynhiemšyr, niedaloka ad miesca, dzie vyras piśmieńnik Džejms Hrechem, piša Guardian.
Hrechem, jaki napisaŭ scenaryj dla sieryjała, stvaraje kranalnuju i pierakanaŭčuju historyju tych padziej i pradstaŭlaje nam horad, napoŭnieny smutkam i horyčču, asabistaj varožaściu i hłybokimi ranami.
Hery Džeksan, vierny člen Nacyjanalnaha sajuza harniakoŭ, žyvie ŭ miastečku, dzie daminuje Sajuz demakratyčnych šachcioraŭ, jaki zaniaŭ nie samuju ćviorduju pazicyju ŭ dačynieńni da zabastovak i pryvatyzacyi vuhalnaj pramysłovaści.
Adnojčy Hery znachodziać miortvym na vulicy.
Pieršy padazravany — miascovy chłopiec Dyn, ź jakim Džeksan šmat spračaŭsia apošnim časam.
Jašče adna linija rasśledavańnia — historyja aryštu Hery za 1984 hod, kali z Džeksana źniali abvinavačvańnie praz umiašalnictva adnaho z łondanskich palicejskich. Raptam vyśviatlajecca, što zapisy pra aryšt aktyvista byli padroblenyja.
Jašče adny padazronyja — miascovaja siamja handlaroŭ narkotykami, čyj syn niekali zapužvaŭ Hery.
U dadatak, svajak Keci zajmajecca stralboj z łuka, a zbroja zabojstva Džeksana — arbalet. Keci — siastra Džuli, žonki Džeksana. Žančyny z časam usio bolš addalajucca adna ad adnoj, chacia jany i žyvuć pobač.
Ale ž i Džeksan mieŭ svaje škilety ŭ šafie. Akazvajecca, što mužčyna šmat cikaviŭsia tajnaj dziejnaściu palicyi, i heta pryvodzić śledčych da niečakanaj dumki nakont pryčyn jaho zabojstva.
U lubym vypadku, rasśledavańnie śmierci Džeksana ŭražvaje svajoj maštabnaściu.
«Šervud» niečym nahadvaje hulniu ŭ boŭlinh, i stvaralniki sieryjała zabivajuć strajk: my majem scenarysta, jaki cudoŭna viedaje śfieru, pra jakuju piša, i akcioraŭ, jakija demanstrujuć šykoŭnuju ihru. Heta jašče i raskaz pra 40 apošnich hadoŭ historyi brytanskich šachcioraŭ, stvorany ź luboŭju i ŭvahaj da padrabiaznaściaŭ, ale biez achviaravańnia siužetam dy napružańniem.
Brytanskija krytyki pryniali «Šervud» z zachapleńniem. U recenzii The Telegraph (jak i ŭ The Guardian) sieryjał atrymaŭ 5 zorak z 5 i tytuł «najlepšaj za hod dramy VVS na hety momant». Vydańnie The Independent dało sieryjału 4 zorki i nazvała scenaryj «spahadlivym dy jarkim».
Rejtynhi na vialikich suśvietnych resursach
IMDB — 7,7/10,
Rotten Tomatoes — 100%.
Film tydnia: «Łułu i Bryhz». Śvietłaja historyja pra toje, jak čałaviek i sabaka źmianili adzin adnaho
Što pahladzieć. «Raździaleńnie» — hipnatyzujučy ofisny tryler z vysokimi rejtynhami i zachoplenymi vodhukami
Zahinuŭ biełaruski dobraachvotnik Vasil «Dzir» Rapicki11
Kamientary