Film tydnia: «Łułu i Bryhz». Śvietłaja historyja pra toje, jak čałaviek i sabaka źmianili adzin adnaho

Aficer i bajavy sabaka vypraŭlajucca ŭ padarožža

Pačniom z pradstaŭleńnia. Łułu — bielhijskaja aŭčarka (jaje hrajuć try roznyja i sapraŭdy talenavityja sabaki). Heta były armiejski pios, istota, jakuju vučyli pieraśledavać i zabivać ludziej. Jon udzielničaŭ u sapraŭdnych bajach u Iraku i Afhanistanie. Łułu pakutuje ad nastupstvaŭ posttraŭmatyčnaha sindromu, pavodzić siabie niestabilna i časam demanstruje lutaść.

Voś takoha sabaku treba dastavić na pachavańnie byłoha vajennaha aficera, jaki niekali treniravaŭ Łułu. Šlach niablizki — sa štata Vašynhton u Aryzonu, kala tysiačy kiłamietraŭ.

I ŭ hetym padarožžy sabaku budzie supravadžać čałaviek, badaj, ź nie mienš składanaj historyjaj.

Jaho imia Džeksan Bryhz. Heta hieroj Čeninha Tatuma — vy dakładna bačyli hetaha akciora ŭ papularnych (ale nie nadta rejtynhavych) stužkach nulavych i nie tolki. U «Kroku napierad», «Šturmie Biełaha doma» i inšych karcinach Tatum vystupaŭ jak ramantyčny hieroj-mača, ale ŭ «Łułu i Bryhz» jon biare na siabie vielmi šmat.

Ci vyciahnie heta Tatum, jaki ŭ dadatak da ŭsiaho jašče i zrežysiravaŭ karcinu? Vysnovu možacie zrabić sami. Darečy, u hetym hodzie vychodziać niekalki stužak z zorkami pieršaj vieličyni, u jakich źniaŭsia i Čeninh, uziać chacia b «Zhubleny horad» z Sandraj Bałak. Tatum sprabuje vyjści z ampłua pryhožaha chłopca i kapać u svajoj pracy hłybiej.

Hieroj Tatuma — Džeksan Bryhz — były vajskoviec. Praz traŭmu hałavy Bryhz nie maje dazvołu słužyć u armii, ale ž jon spadziajecca tudy viarnucca — treba tolki, kab za jaho zakinuli słoŭca. Hetuju zadaču Bryhzu dapamohuć vyrašyć, kali jon vykanaje zadańnie, to-bok dastavić Łułu na pachavańnie ŭ Aryzonu.

Šlach da adradžeńnia

I Łułu, i Bryhz majuć svajo ciažkaje minułaje, i praz heta nie mohuć daviarać navakolnym i ŭsiamu śvietu. Sumiesnaje padarožža dapamahaje im źmianicca da lepšaha. 

Z adnaho boku, u stužcy chapaje momantaŭ, što demanstrujuć: i Łułu, i Bryhz usio jašče nie pazbavilisia svajho posttraŭmatyčnaha rasstrojstva. Naprykład, sabaka niejak bačyć čałavieka ŭ musulmanskim adzieńni i adrazu napadaje na jaho, bo heta toje, čamu aŭčarku vučyli. Tym časam Bryhz chvalicca, kolki čałaviek jon paśpieŭ zabić, i nie nadta analizuje, što heta značyć.

Ale ž «Łułu i Bryhz» usio-tki siamiejny film, i tamu nam nie dajuć zanadta šmat sumavać.

Kali vy šukajecie dla siabie ciopły, navat sientymientalny film na kaniec tydnia, «Łułu i Bryhz» stanie dobrym vybaram.

Rejtynhi na vialikich suśvietnych resursach

IMDB — 6,9 / 10,

Rotten Tomatoes — 76%.

Film tydnia: «Kamon Kamon». Kranalnaja čorna-biełaja drama z hienijalnym Chaakinam Fieniksam

Što pahladzieć. «Miunchien: na miažy vajny» — špijonski tryler pra Miunchienskuju zmovu, jaki pakidaje adčuvańnie dežaviu

• 1
• 0
• 0
• 0
• 0
• 0
• 1
• 0