Ranałdu trapiŭ u skandał: zorny futbalist raźbiŭ telefon fanata z aŭtyzmam
Kryšcijanu Ranałdu, adzin z najlepšych futbolnych hulcoŭ płaniety, apynuŭsia ŭ vielmi niepryhožaj historyi. Paśla niaŭdałaha matča futbalist vymiaściŭ emocyi na telefonie chłopca-fanata — pavodziny, jakija zusim nie nazavieš spartyŭnymi. Da taho ž vyśvietliłasia, što chłopiec z aŭtyzmam.
Usio zdaryłasia 9 krasavika, kali Ranałdu, forvard «Mančester Junajted», vyjšaŭ na pole ŭ składzie svajoj kamandy na hulniu z «Eviertanam». Hulnia nie ŭdałasia ni dla Ranałdu, ni dla jaho kłuba: Kryšcijanu amal nie było bačna na poli, dy i sam «MIU» vyhladaŭ jak ułasny cień, chacia bukmiekiery čakali ad kamandy pieramohi. Vynik — 1:0 na karyść «Eviertana», kłuba ŭ stanie kryzisu. Da taho ž Ranałdu raźbili halonku da kryvi.
Kali matč skončyŭsia, fanaty «Eviertana» — hulnia prachodziła na chatnim stadyjonie kłuba — aśvistvali haściej z Mančestera. I Ranałdu nie strymaŭsia: jon vybiŭ z ruki fanata telefon, aparat upaŭ i raźbiŭsia.
Za heta karystalniki sacsietak abrynulisia na Ranałdu z krytykaj. «Mančester Junajted» paviedamiŭ, što rasśleduje incydent, a sam futbalist paprasiŭ prabačeńnia za svaje pavodziny.
«Vielmi składana spraŭlacca z emocyjami ŭ takija ciažkija momanty, jak toj, ź jakim my sutyknulisia. Tym nie mienš my zaŭsiody pavinny prajaŭlać pavahu i ciarpieńnie i padavać prykład usioj moładzi, jakaja cenić pryhožuju hulniu. Ja chaču paprasić prabačeńnia za svaju porstkaść i, kali mahčyma, zaprasić hetaha balelščyka pahladzieć hulniu na «Ołd Trafard» (chatni stadyjon «Mančester Junajted», — «NN») u znak padtrymki sumlennaj hulni i spartyŭnych pavodzin», — skazaŭ Ranałdu.
Zornyja vybačeńni nie nadta zadavolili maci taho samaha fanata. Žančyna, jakuju zavuć Sara Kieli, źviazałasia z žurnalistami i raskazała svaju viersiju historyi. Sara razam z 14-hadovym synam Džejkam Chardynham siadzieła niedaloka ad miesca, dzie futbalisty prachodzili ŭ raspranalniu paśla hulni. Kali mima išoŭ Ranałdu, Džejk pabačyŭ, što z nahi ŭ hulca ciače kroŭ, i nachiliŭsia, kab pabačyć, što zdaryłasia z Kryšcijanu. Tady Ranałdu i vybiŭ telefon ź jaho ruk.
Kieli raspaviała, što dla jaje syna heta było pieršaje naviedvańnie futbolnaha matču, i ciapier jon «u poŭnym šoku».
Chłopiec maje aŭtyzm i dyspraksiju (razład kaardynacyi ruchaŭ, — «NN»), jon amal nie ŭśviedamlaŭ, što adbyłosia na stadyjonie, pakul nie viarnuŭsia dadomu. «Na pamiać» ad sustrečy z Ranałdu ŭ Džejka zastaŭsia siniak na ruce, raźbity telefon i niežadańnie jašče niekali viartacca na stadyjon.
Miascovaja palicyja taksama zacikaviłasia historyjaj. Ciapier jana vyvučaje materyjały z kamier nazirańnia na stadyjonie i hutaryć sa śviedkami padziej, kab vyśvietlić, ci mieła miesca pravaparušeńnie.
«Naša Niva» adnaŭlaje zbor danataŭ — padtrymać prosta
Čytajcie taksama:
«U maim suśviecie čałaviek, jaki padtrymlivaje vajnu, — nievylečna chvory». Hutarka z kikbaksioram Ivanam Haninym
«Samyja strašnyja ludzi na śviecie — cichoni». Trenier Aleh Dułub pra vajnu i maŭklivych spartoŭcaŭ
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary