Dva aficery KDB padarvalisia na rasijskaj minie ŭ Homielskaj vobłaści
Jak stała viadoma «Našaj Nivie», dva aficery Upraŭleńnia KDB pa Homielskaj vobłaści zahinuli, padarvaŭšysia na supraćtankavaj minie. Mina zastałasia kala łahiera, raźbitaha rasijskimi vojskami kala ŭkrainskaj miažy. Historyja nie afišujecca dziaržstrukturami Biełarusi.
«Rasijskaje farmiravańnie raźbiła łahier u lesie ŭ Homielskaj vobłaści, u rajonie Paleskaha ekałahičnaha zapaviednika, — raskazała «Našaj Nivie» abaznanaja krynica. — Usio rabili pa vajennaj navucy: akapalisia, zaminiravali padychody ź niekalkich bakoŭ, stali łahieram. Jany nie viedali, dzie jany znachodziacca. Mahli dumać, što va Ukrainie. Praź niejki čas atrymali zahad ruchacca na poŭdzień. Kinuli pazicyi, navat zabyli niekalki skrynak z bojeprypasami», — kaža krynica.
Nam nieviadoma, čamu pra łahier nie było infarmacyi ŭ biełaruskich siłavych struktur. Ci havorka pra zboj u kamunikacyi, ci rasijskija vojski sistemna vykarystoŭvajuć terytoryju Biełarusi, nie staviačy biełaruski bok u viadomaść adnosna taho, dzie jany znachodziacca.
«Na ślady łahiera natknuŭsia laśnik pry abychodzie, zaŭvažyŭ skrynki z bojeprypasami i paviedamiŭ, «kudy treba».
U vyniku leśniki pavieźli dvuch aficeraŭ Homielskaha ŭpraŭleńnia KDB pakazvać miesca znachodki, i tyja padarvalisia, imavierna, najechaŭšy na supraćtankavuju minu, jakuju rasijanie pakinuli na padjeździe da łahiera. Ci paciarpieli pry hetym leśniki, nam nieviadoma, a dva KDBisty zahinuli», — paviedamili «Našaj Nivie» ludzi, znajomyja ź situacyjaj.
Na dniach Biełaruskaja słužba radyjo «Svaboda» paviedamlała, što ŭ Mazyry nazirali pachavalnuju pracesiju, jakaja vyjšła z dvara rajonnaha adździeła KDB. Surazmoŭcy žurnalistaŭ raskazvali pra zahadkavy padryŭ supracoŭnika na minie, ale nie viedali detalaŭ. Havorka była pra toj samy vypadak.
Pa infarmacyi «Našaj Nivy» adzin z zahinułych — heta 35-hadovy padpałkoŭnik KDB Andrej Ravucki.
Aficyjnaj infarmacyi pra zdareńnie ŭ dziaržaŭnych ŚMI nie było.
Rasija napała na Ukrainu 24 lutaha, u tym liku z terytoryi Biełarusi. Hetaje hrubaje parušeńnie mižnarodnaha prava było asudžanaje Hienieralnaj asamblejaj AAN 140 hałasami suprać piaci, siarod hetych piaci i Biełaruś.
U vyniku ahresii zahinuli ŭžo tysiačy vajskoŭcaŭ z abodvuch bakoŭ, a taksama mirnych žycharoŭ. Zrujnavanyja tysiačy budynkaŭ u sotni haradoŭ Ukrainy. Na akupavanych terytoryjach adbyvajucca sapraŭdnyja źvierstvy, maštab ich staŭ viadomy paśla adstupleńnia rasijskich vojskaŭ z-pad Kijeva, Čarnihava i Sum.
Zhodna ź mižnarodnym pravam, Biełaruś moža ličycca saŭdzielnicaj ahresii, bo pradastaviła svaju terytoryju dla viadzieńnia vajny.
Čytajcie taksama: Fota i videa z Bučy analizuje sudmiedekśpiertka. Voś što jana pabačyła na strašnych kadrach
Ciapier čytajuć
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?34
Kamientary