Čym viadomy TikTok-błohier Mikita Bialevič, jakoha zatrymali ŭ Minsku
Učora zatrymali zorku biełaruskaha TikTok Mikitu Bialeviča. Heta adbyłosia niedaloka ad ukrainskaj ambasady. Ciapier Mikita znachodzicca na Akreścina, jaho asudzili na 15 sutak nibyta za «niepadparadkavańnie milicyi». Raskazvajem pra hetaha błohiera.
Mikicie Bialeviču 21 hod. Naradziŭsia i vyras jon u Babrujsku. Ciapier žyvie ŭ Minsku.
Letaś Mikita staŭ viadučym biełaruskamoŭnaha TikTok-kanała «Hodnaja muzyka». U rolikach chłopiec raskazvaŭ pra cikavostki ŭ śfiery muzyki, raiŭ, što pasłuchać.
Vosieńniu jon razam z šoumenam Mikitam Najdzionavym i Lizavietaj Vietravaj pačaŭ vieści treveł-błoh «Buś Biełaruś» na YouTube. U im biełaruskamoŭnyja błohiery raskazvali pra vandroŭki pa krainie, «jakoj chočacca dać buśku». Jany abjechali Lepiel, Połack, Ušačy, Hierviaty, Halšany, Smarhoń, Babrujsk. U rolikach raskazvajecca nie tolki pra architekturu i historyju miescaŭ, ale i pra sučasny kałaryt.
«Ja nie liču, što zajmajusia niečym supiercikavym. Ale mnie padabajecca toj fakt, što mnie 21 hod i, nie majučy vyšejšaj adukacyi, ja całkam samadastatkovy čałaviek. Bo nie tolki stvaraju błoh, ale zdymaju videa, sam zdymajusia, pradziusuju, režysuju. Pakul jašče tradycyjny scenaryj maładych ludziej taki: skončyŭ škołu, pastupiŭ va ŭniviersitet, źjechaŭ ad baćkoŭ. I pačynaješ isnavać adzin, samastojna. Žyvieš u internacie, z adnakurśnikami — i heta vielmi važny elemient sacyjalizacyi. U hetym sensie luby ŭnivier hraje vialikuju rolu. Ale dla taho, kab zajmacca lubimaj spravaj, žyć u kajf, nieabaviazkova mieć koračku», — kazaŭ Mikita ŭ intervju «1387.by».
Taksama chłopiec adznačaŭ, što choča zastacca ŭ Biełarusi i praciahvać stvarać kantent na karyść ludziej i biełaruskaj kultury.
«Niadaŭna sfarmulavaŭ dla siabie ŭłasnuju misiju ŭ miedyjaprastory — ja vuču biełarusaŭ hanarycca saboj. Jość takaja zaviadzionka: kab miascovym vykanaŭcam stać papularnymi doma, śpiarša treba damahčysia słavy za miažoj. U asnoŭnym, u Rasii. My pačynajem hanarycca Karžom, kali jamu apładziruje Maskva. I z «Bi-2» hetak ža, i z «ŁSP», dy ź inšymi. Maja zadača — pakazać, kolki krutoha jość u Biełarusi, kolki ŭsiaho kłasnaha robiać biełarusy i biełaruski. Davajcie hanarycca tym, što my sami stvarajem!» — kazaŭ błohier «1387.by».
U Minsku zatrymali TikTok-błohiera Mikitu Bialeviča
Historyka Alesia Biełaha asudzili na 15 sutak
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary