«Rasija blizkaja da poŭnaj parazy». 12 tezisaŭ Frensisa Fukujamy pra toje, jakija nastupstvy budzie mieć pieramoha Ukrainy ŭ vajnie

Hetyja 12 punktaŭ apublikavaŭ anłajn-časopis American Purpose. 

1. Poŭnaja paraza Rasii va Ukrainie ŭsio bližejšaja. Rasiju padviało płanavańnie. Jany hruntavalisia na pamyłkovym ujaŭleńni, što ŭkraincy ich čakajuć, a ŭkrainskaja armija raźbiažycca paśla pieršych avijaŭdaraŭ. Rasijskija sałdaty zamiest suchpajka vieźli z saboj paradnuju formu. Ciapier Pucin kinuŭ na Ukrainu ŭsie svaje siły — u jaho niama vialikich reziervaŭ, jakija možna było b zadziejničać u bai. Rasijskija vojski zabuksavali pad roznymi ŭkrainskimi haradami, im nie chapaje zabieśpiačeńnia, a ŭkraincy bjuć ich to tut, to tam.

2. Krach rasijskaj armii moža być raptoŭnym i katastrafičnym, vajna nie abaviazkova zaciahniecca. U palavych umovach vojska dasiahnie punktu, kali ŭ jaho nie zastaniecca ni resursaŭ, ni darohi dla adstupleńnia, i žadańnia vajavać nie zastaniecca. Niešta takoje ŭžo adbyvajecca na poŭnačy Ukrainy; spravy ruskich na poŭdni iduć lepš, ale i tam im nie ŭstajać, kali hrupoŭki na poŭnačy buduć raźbityja.

3. Da momantu, kali rasijskaja armija zachistajecca, dypłamatyčnaje rašeńnie kanfliktu niemahčymaje. Kampramis, prymalny jak dla Rasii, tak i dla Ukrainy, naŭrad ci mahčymy, uličvajučy, kolki strat jany paciarpieli.

4. Rada Biaśpieki AAN čarhovy raz dakazała svaju bieskarysnaść. Adzinaj karysnaj rečču było hałasavańnie na Hienieralnaj Asamblei, jakoje dapamahaje vyjavić drennych ci bajaźlivych hulcoŭ.

5. Abodva rašeńni administracyi Bajdena — nie zakryvać nieba nad Ukrainaj i nie pieradavać joj polskich «MiHaŭ» — byli pravilnymi. Jany zachavali chałodny rozum u hety vielmi emacyjny čas. Lepš, kab ukraincy pieramahli rasiejcaŭ samastojna, kab u Maskvy nie było šancu apraŭdacca, što na ich napała NATO, i kab nie adbyłosia lišniaj eskałacyi. Polskija «MIHi» nie nadta dapamahli b ukraincam. Značna važniejšaja bieśpierapynnaja pastaŭka Javelins, Stingers, TB2, lekaŭ, srodkaŭ suviazi, a taksama abmien raźvieddanymi. Ja dumaju, što ŭkraincy ŭžo majuć dostup da źviestak raźviedak NATO.

6. Ukraina płacić vielmi vialikuju canu, heta praŭda. Ale bolš za ŭsio škody nanosiać rakiety i artyleryja, ź jakimi ni «MiHi», ni biespalotnaja zona ničoha nie mohuć zrabić. Adzinaje, što spynić pralićcio kryvi — heta paraza suchaputnych čaściej rasijskaj armii.

7. Pucin nie pieražyvie parazy va Ukrainie. Jaho padtrymlivajuć, bo ličać mocnym lidaram; što ad jaho zastaniecca, kali stanie jasnaja jaho niekampietentnaść?

8. Uvarvańnie naniesła strašny ŭdar pa papulistach va ŭsim śviecie, pa ŭsich tych, chto simpatyzavaŭ Pucinu — pa Matea Salvini, pa Žairu Bałsanaru, Maryn Lo Pen, Viktaru Orbanie i, viadoma, pa Donaldzie Trampie. Raźviazvańnie vajny pakazała, da čaho davodzić aŭtarytaryzm.

9. Hetaja vajna, u peŭnaj stupieni, — dobraja navuka dla Kitaja. Jak i Rasieja, Kitaj na praciahu apošniaha dziesiacihodździa naroščvaŭ nibyta vysokatechnałahičnyja vajskovyja siły, ale hetyja siły nie majuć realnaha bajavoha dośviedu. Kitajskaja avijacyja, peŭna, paŭtoryć sumny prykład rasijskaj, u jakoj taksama niama dośviedu składanych apieracyj u pavietry. Budziem spadziavacca, što kiraŭnictva Kitaja nie budzie takim adarvanym ad rečaisnaści, jak kramloŭskaje, kali paŭstanie pytańnie adnosin z Tajvaniem.

10. Spadziajomsia, što Tajvań sam zrazumieje, što treba rychtavacca da zmahańnia, jak ukraincy rychtavalisia, i adnović pryzyŭ na vajskovuju słužbu.

11. Tureckija drony «Bajraktar» stali biestselerami.

12. Paraza Rasiei zrobić mahčymym «uvaskrasieńnie svabody», bolš možna nie pieražyvać z nahody adstupleńnia demakratyi ŭ śviecie. Duch 1989-ha žyvy i budzie žyć, i ŭsio dziakujučy advazie ŭkraincaŭ.

• 65
• 0
• 1
• 3
• 1
• 3
• 5
• 0