Na rasijskaj Radzie biaśpieki abmierkavali pryznańnie «DNR» i «ŁNR». Usie za, rašeńnie budzie pryniataje siońnia
Na siońniašniaj terminovaj naradzie rasijskaj Rady biaśpieki, jakaja adbyłasia pad staršynstvam Uładzimira Pucina, abmiarkoŭvalisia pieradusim pytańni abvastreńnia situacyi na Danbasie i pryznańnia niezaležnaści samaabvieščanych «DNR» i «ŁNR».
Vystupali, akramia samoha rasijskaha prezidenta, ministr zamiežnych spraŭ Siarhiej Łaŭroŭ, namieśnik kiraŭnika administracyi prezidenta Dźmitryj Kazak, dyrektar FSB Alaksandr Bortnikaŭ, ministr abarony Siarhiej Šajhu, namieśnik staršyni Rady biaśpieki Dźmitryj Miadźviedzieŭ, staršynia Dziarždumy Viačasłaŭ Vałodzin, staršynia Savieta Fiederacyi Valancina Matvijenka, sakratar Rady biaśpieki Mikałaj Patrušaŭ, premjer-ministr Michaił Mišuścin, dyrektar Słužby źniešniaj raźviedki Siarhiej Naryškin, ministr unutranych spraŭ Uładzimir Kałakolcaŭ, kiraŭnik Rashvardyi Viktar Zołataŭ.
Usie, chto vystupaŭ, adnahałosna vykazalisia za pryznańnie «DNR» i «ŁNR», užyvali vyrazy «karnyja apieracyi», «fašyscki banderaŭski režym», «nacysckija kijeŭskija ŭłady» i h. d.
Alaksandr Bortnikaŭ zajaviŭ siarod inšaha pra toje, što ŭ pałon uziaty ŭkrainski vajskoviec, jaki nibyta ŭdzielničaŭ u hetych apieracyjach.
Usimi vystupoŭcami rabiŭsia akcent na «niesamastojnaści» Ukrainy, na tym, što za ich śpinaj nibyta stajać ZŠA i inšyja krainy Zachadu i kali pra niešta havaryć, to tolki ź imi.
Viktar Zołataŭ, u minułym kiraŭnik achovy Uładzimira Pucina, a ciapier kiraŭnik unutranych vojskaŭ, skazaŭ, što niama rasijska-ŭkrainskaj miažy, a jość faktyčna rasijska-amierykanskaja.
Padkreślivałasia, što Minskija pahadnieńni zajšli ŭ tupik, Ukraina ich nie źbirajecca vykonvać. Šmat kazałasia vysakaparnych słoŭ pra pakuty «naroda Danbasa», adznačałasia, što mnohija ź jaho žycharoŭ hramadzianie Rasii. Rasija ŭžo niekalki hadoŭ jak viadzie kampaniju pryniaćcia žycharoŭ Danbasa ŭ svajo hramadzianstva.
Pucin skazaŭ, što pytańni pryznańnia «DNR» i «ŁNR» nibyta nie abmiarkoŭvalisia ŭ ich kołach raniej, tamu treba nakont jaho ŭsim vykazvacca tut.
Peŭnym dysanansam prahučaŭ vystup dyrektara Słužby źniešniaj raźviedki (SVR) Siarhieja Naryškina.
Naryškin skazaŭ, što, maŭlaŭ, treba vystavić Ukrainie ultymatum — kab jana faktyčna kapitulavała i vykanała Minskija damoŭlenaści, a kali nie vykanaje, to tady pryznavać «respubliki». Z vusnaŭ Naryškina prahučali navat słovy pra niepasrednaje ŭklučeńnie «ŁNR» i «DNR» u skład Rasii. Pucin, adnak, padkreśliŭ, što havorka idzie tolki pra pryznańnie «niezaležnaści».
Naryškin źbiŭsia i staŭ niaŭpeŭniena marmytać, što jon taksama.
Uładzimir Kałakolcaŭ zrabiŭ prapanovu, što treba pryznavać samaabvieščanyja «respubliki» nie tolki ŭ tych miežach, jakija jany siońnia realna kantralujuć, ale i całkam Danieckaj i Łuhanskaj abłaściej.
U vyniku Pucin paabiacaŭ pryniać rašeńnie adnosna pryznańnia niezaležnaści «DNR» i «ŁNR» siońnia.
Chutčej za ŭsio, narada z Pucinym prajšła dniom i była pakazanaja ŭ zapisie: žurnalisty zaŭvažyli, što hadzińnik Siarhieja Šajhu pakazvaŭ 12:47 (na piać hadzin mienš). Taksama ŭ kadr trapiŭ hienprakuror Ihar Krasnoŭ, jaki idzie ad trybuny, ale jahony vystup nie pakazali.
Čytajcie taksama: Hałoŭnaje pytańnie zaraz — u jakich miežach Rasija pryznaje tak zvanyja «Danieckuju» i «Łuhanskuju narodnyja respubliki»
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary