Padpisaŭ list za Łukašenku i trapiŭ u składanuju historyju kachańnia. Što viadoma pra pieršaha biełaruskaha miedalista Piekina
U Biełarusi — pieršy miedal Piekina-2022. U indyvidualnaj honcy na 20 kiłamietraŭ srebra zbornaj prynios Anton Smolski. Raskazvajem, što pra jaho viadoma.
Zhadvajem asnoŭnyja fakty pra spartoŭca.
Adziny biełaruski bijatłanist, ad kaho bukmiekiery čakali vynikaŭ
Smolskamu 25 hadoŭ, jon u bijatłonie z 2012-ha. Naradziŭsia ŭ vioscy Piasočnaje, što ŭ Minskaj vobłaści, vučyŭsia ŭ Kapylskaj SDZIUŠOR. Akramia bijatłona, zajmaŭsia ŭ toj čas vajennym mnahaborstvam.
U junackim uzroście Smolski nieadnarazova braŭ miedali krupnych startaŭ. Tak, u 2017-m hodzie jon vyjhraŭ bronzu na junijorskim čempijanacie śvietu ŭ honcy pieraśledu, a ŭ siezonie 2017/2018 upieršyniu vystupiŭ na Kubku śvietu.
Alimpijada ŭ Piekinie — druhija zimovyja Alimpijskija hulni dla Antona. Lepšy indyvidualny vynik Smolskaha na jaho pieršych Hulniach u Pchiončchanie — 33-je miesca ŭ honcy pieraśledu, plus była ŭ jaho i 8-ja pazicyja ŭ składzie mužčynskaj estafiety. Tamu srebra Piekina — pieršaja alimpijskaja ŭznaharoda ŭ žyćci spartsmiena.
Ale ž u siezonie 2021/2022 Smolski narešcie pačaŭ pakazvać vyniki. Z etapaŭ bijatłonnaha Kubku śvietu Anton pryvioz piać miedaloŭ — adno srebra i čatyry bronzy. Pry hetym u minułym siezonie spartoviec redka akazvaŭsia na Kubku ŭ pieršaj dziasiatcy atletaŭ.
Cikava, što Anton akazaŭsia adzinym pradstaŭnikom ajčynnaj mužčynskaj zbornaj pa bijatłonie, kaho zhadali ŭ svaich miedalovych prahnozach bukmiekiery. Ale ž nie ź lepšym kaeficyjentam. U indyviduałcy kantory abiacali Smolskamu miescy z 15 pa 18-je, a kaeficyjent na jaho pieramohu składaŭ ažno 67.
Padpisaŭ list za Łukašenku i trapiŭ u składanuju historyju kachańnia
Smolski — spartsmien-instruktar Spartovaha kamiteta biełaruskich Ŭzbrojenych sił, a taksama padpisant tak zvanaha praŭładnaha lista spartoŭcaŭ, stvoranaha ŭ supraćvahu listu spartoŭcaŭ za sumlennyja vybary. Razam z Antonam list padpisali i inšyja jaho kalehi pa zbornaj — usie, aproč Hanny Soły. Pry hetym sam Smolski nikoli nie vykazvaŭsia publična ŭ padtrymku Łukašenki.
Siarod zacikaŭlenaściaŭ chłopca - muzyka i mašyny. Jak śviedčyć mama Smolskaha, lubimaja strava bijatłanista — hrečnievaja kaša. Ułasnym kumiram Smolski ličyć viadomaha rasijskaha bijatłanista Antona Šypulina.
Chutčej za ŭsio, Anton taksama akazaŭsia pryčynaj razładu ŭ žanočaj bijatłonnaj zbornaj Biełarusi. Sprava ŭ tym, što niadaŭna stała viadoma pra kanflikt pamiž bijatłanistkaj Dzinaraj Alimbiekavaj i jaje kalehami pa kamandzie, pierš za ŭsio Hannaj Sołaj.
Mierkavana, hety kanflikt jakraz źviazany sa Smolskim, jaki ciapier znachodzicca ŭ adnosinach z Alimbiekavaj. Dzinara jakraz akazałasia adnoj ź pieršych, chto pavinšavaŭ Smolskaha ź miedalom: «Vyjšaŭ i zrabiŭ jak mužčyna. Za maje ŭčorašnija ślozy! Hanarusia! Ura».
Raniej Smolski byŭ žanaty ź inšaj bijatłanistkaj, Darjaj Ijerapies. Chadzili čutki, što sustrakacca z Alimbiekavaj Anton pačaŭ jašče padčas šlubu ź Ijerapies. Pry hetym Ijerapies maje ad Smolskaha dzicia — dziaŭčyncy, jakuju kličuć Alaksandra, u červieni spoŭnicca try hady.
Za srebra Piekina Anton Smolski atrymaje ad dziaržavy 75 tysiač dalaraŭ.
Kamientary