«Telegram zabłakavać vielmi prablematyčna». Śledčy raskazaŭ, što ŭskładniaje baraćbu z kibierzłačynstvami ŭ Biełarusi

U 2014 hodzie ŭ Biełarusi byli źmienienyja praviły rehistracyi elektronnych kašalkoŭ. Heta pryviało da taho, što karystalniki pierajšli na zamiežnyja płaciežnyja sistemy. Tak administratyŭny barjer uskosna ŭskładniŭ pracu biełaruskich śledčych z kibierzłačynstvami: adsačyć złačynnyja apieracyi i datyčnych da ich asob stała składaniej.

Jašče adna prablema: u Biełarusi niama normaŭ, jakija rehłamientujuć aryšt na tokieny i elektronnyja hrošy. Jość prablemy z kampietencyjaj siłavikoŭ, abstalavańniem i mietodykami raskryćcia kibierzłačynstvaŭ.

Taksama niama dakładnych patrabavańniaŭ, jakija datyčacca terminaŭ i abjomu zachoŭvańnia infarmacyi ŭ žurnałach siervieraŭ kampanij. U čas rasśledavańnia adnoj sa spraŭ vyśvietliłasia, što nie ŭsie arhanizacyi viaduć takija žurnały. 

Isnujuć supiarečańni pamiž žadańniem kampanij pradastavić nasielnictvu infarmacyjnyja pasłuhi i mahčymaściu zrabić hetu pasłuhu biaśpiečnaj. Tak, u 2017 hodzie mabilny apieratar A1 zapuściŭ pasłuhu v-banking, jakoj aktyŭna karystalisia złačyncy, jany afarmlali jaje na trecich asob. 

Padčas rasśledavańnia kryminalnaj spravy, źviazanaj z kradziažom z vykarystańniem kampjutarnaj techniki, stała viadoma, što adzin z bankaŭ nie źviarnuŭsia svoječasova ŭ pravaachoŭčyja orhany, viedajučy ab prablemie. Adnak kiraŭnictva paličyła, što heta naškodzić reputacyi banka, što pasłužyła ŭmovaj dla ŭtojvańnia złačynstva.

Jašče adna istotnaja prablema, jak adznačaje pradstaŭnik SK, niemahčymaść technična zabłakavać asobnyja resursy: «Prykład — internet-miesiendžar Telegram, zabłakavać jaki vielmi prablematyčna».

Jość i vidavočnaja prablema — zanadta prostyja paroli, jakija staviać karystalniki. Zhodna z dakładam kampanii Verizon, u 81% vypadkaŭ niesankcyjanavany dostup da danych byŭ atrymany dziakujučy parolam, jakija chakiery lohka adhadali. 

Aproč techničnych i jurydyčnych prablem, jość i čysta palityčnyja, adznačaje śledčy Mielnik. Niepryznańnie palityčnaj subjektnaści viadzie da taho, što zamiežnyja dziaržavy admaŭlajuć pradastaŭlać Biełarusi pravavuju dapamohu, złačyncy pra heta viedajuć i karystajucca momantam.

Pry hetym śledčy adznačaje, što «va ŭmovach destabilizacyi palityčnaj abstanoŭki zacikaŭlenymi hrupami i arhanizacyjami, a taksama dziaržavami tokieny i elektronnyja hrošy mohuć vykarystoŭvacca dla finansavańnia złačynnych hrupovak, jakija pracujuć u intaresach tych arhanizacyj praz hramadskija abjadnańni i palityčnyja siły».

Heta ŭpisvajecca ŭ rytoryku prapahandy pra finansavańnie pratestaŭ Biełarusi z-za miažy. 

• 0
• 0
• 0
• 0
• 0
• 0
• 0
• 0