«Ci ŭsie ekanomiać i napružvajucca?» Łukašenka — ab prajekcie deficytnaha biudžetu na 2022 hod
Druhi hod zapar biudžet budzie deficytnym.
Łukašenka siońnia pravodzić naradu nakont biudžetu na 2022 hod, paviedamlaje BiełTA.
«Varta pamiatać, što ludziam nie patrebnyja ličby i pakazčyki. Našych hramadzian chvalujuć blizkija im pytańni: zarobak, praca, ceny. U hetym kantekście i prašu vieści naš dyjałoh — ci dastatkova zapłanavana mier pa kantralavanych mnoj pytańniach», — źviarnuŭsia Łukašenka da ŭdzielnikaŭ narady.
Jon źviarnuŭ uvahu, što prajekt biudžetu na 2022 hod farmujecca deficytnym.
«Z adnaho boku, zrazumieła čamu. My niasiom niezapłanavanyja vydatki, jakija składana pradbačyć. Ale ź inšaha, pytańnie — ci ŭsie ekanomiać i napružvajucca pa skaračeńni nieabaviazkovych vydatkaŭ, jakich u nas mora».
«Tamu pytańnie ekanomii, bieražlivaści znoŭ vystupaje na pieršy płan. Ci jość krynicy na pakryćcio deficytu? Ci nie paciahnie heta napružanaści pry vykanańni sacyjalnych abaviazacielstvaŭ?»
«Urad miarkuje, što ŭ nastupnym hodzie ŭ pryjarytet treba ŭźvieści ekspart — adznačyŭ jon.
— Heta razumna. Bo pakul jość mahčymaść pradavać i zamacoŭvacca na suśvietnych rynkach (a heta nie budzie doŭha) — treba dziejničać. Upuskać momant, kab zajavić pra siabie, nielha. Budziem intensiŭna naroščvać valutnuju vyručku, atrymajem mocny biełaruski rubiel. Nasielnictva pierastanie aściarožničać i prapanuje hrošy ŭ depazity i ablihacyi».
Hałoŭnaj zadačaj jon ličyć nie dapuścić pieranosu sankcyj na nasielnictva. Biełarusy nie pavinny adčuć ich dziejańnie.
«Voś heta hałoŭnaja zadača. Jakija b ni byli sankcyi, jak by na nas ni cisnuli, što b z nami ni sprabavali zrabić, my pavinny rabić takija miery, kab ludzi hetych sankcyj nie adčuli. Prynamsi, kab hetyja sankcyi i miery zvonku nie vyznačali žyćcio ludziej. Zapomnicie: heta hałoŭnaje», — skazaŭ Łukašenka.
Taksama Łukašenka adznačyŭ, što ciapier samaja abmiarkoŭvajemaja tema— vysokaja inflacyja».
«My płanujem u budučym hodzie mieć adnaznačnuju ličbu inflacyi ŭ 6%», — skazaŭ jon.
Jon adznačyŭ, što inflacyja zbolšaha źjaŭlajecca impartavanaj, i nie varta prymać hety arhumient, jak adziny. Taksama jon zapatrabavaŭ dałažyć ab mierach pa strymlivańni inflacyi. Jon papiaredziŭ, što jany nie pavinny strymlivać i ekanamičny rost.
«I pamiatajcie: heta nie pavinna iści ŭ škodu ekanamičnamu raźvićciu krainy, za jakuju vy adkazvajecie ŭ źviazcy z premjer-ministram. Paznačcie, jakija miery padtrymki ekanamičnaha rostu praduhledžanyja hrašova-kredytnaj palitykaj na 2022 hod», — skazaŭ Łukašenka staršyni Nacbanka.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary