Hitler suprać Zialinskaha. Vybary mera francuzskaha haradka «zavirusilisia» z-za proźviščaŭ kandydataŭ
Haradok Arsi-siur-Ob na poŭnačy Francyi niečakana staŭ zorkaj francuzskaha siehmienta sacsietak. Pryčyna — druhi tur vybaraŭ mera, dakładniej, proźviščy kandydataŭ, piša Bi-bi-si.
Za pasadu kiraŭnika horada pazmahajucca ciapierašni mer Šarl Itler (Charles Hittler) i jaho małady sapiernik Antuan Reno-Zialinski (Antoine Renault-Zielinski).
Treci kandydat u mery — Ani Suka (Annie Soucat).
«Poŭnaje varjactva, — paskardziŭsia Bi-bi-si Šarl Itler. — Ja ŭsio žyćcio čas ad času čuju žarty nakont svajho proźvišča. Časam mnie prymaloŭvali vusiki na pieradvybarnych płakatach. Ale heta łuchta».
«Ale zaraz sprava zajšła ŭžo zanadta daloka, — praciahnuŭ Itler. — Ja bačyŭ u internecie artykuły pra toje, što, maŭlaŭ, 37% žycharoŭ Arsi — hitleraŭcy. Žonka płača».
Francuzski siehmient sacsietak zapoŭnieny «žartami» pra sutyčku Adolfa Hitlera z Uładzimiram Zialenskim.
Mer kaža, što heta ŭvaha da jaho horada ŭžo pačynaje nadakučać.
Adkul takija proźviščy?
«Kali b ludzi abmiarkoŭvali horad i našu palityku, heta adna sprava. Ale ž ich cikaviać tolki našy proźviščy!» — narakaje Itler.
Jakim ža čynam u hetaha francuza, byłoha zahadčyka łabaratoryi, akazałasia takoje proźvišča? I čamu jon jaho nie źmianiŭ?
«Maje prodki — z Elzasa, moj baćka byŭ tam pastuchom. Padčas vajny jaho pavieźli na pracy ŭ Hiermaniju», — tłumačyć Itler.
Elzas — histaryčna niamieckamoŭny rehijon, jaki zaraz uvachodzić u skład Francyi.
[U francuzskaj i niamieckaj movach vymaŭleńnie proźvišča Hittler supadaje z tym, jak vymaŭlajecca imia nacysckaha fiurera Adolfa Hitlera. Tolki pa-niamiecku proźvišča hučyć prykładna jak «Chitler», a pa-francuzsku — prykładna jak «Itler».]
«Zatym jon viarnuŭsia i sustreŭ maju maci, — praciahnuŭ mer. — Usie im kazali, maŭlaŭ, treba vam źmianić proźvišča. Heta było ŭ 1949 hodzie, pamiać pra vajnu była jašče vielmi śviežaja. Ale źmianić proźvišča — heta była kuča biurakratyi i hrošaj, tak što jany nie źmianili».
U Francyi, pa słovach Šarla, Itleraŭ zastałosia zusim mała. Va ŭsich jaho svajakoŭ u Elzasie byli dački, tak što tam proźvišča źnikaje. Adzin ź jaho synoŭ vymaŭlaje svajo proźvišča «Itlej», kab nie było nieparazumieńniaŭ. Unuki ŭziali proźviščy ich maci.
Praŭda, u Šarla jašče jość dačka, jakaja nosić toje ž proźvišča Itler, a taksama niaviestka z tym ža proźviščam, pryčym jany taksama bałatujucca na municypalnych vybarach, tolki ŭ inšych haradach Francyi.
«Kali ty viadomy čałaviek, proźvišča hublaje značeńnie. Ludzi hladziać na čałavieka, a nie na proźvišča. Dla ŭsich maich znajomych ja zaŭsiody byŭ prosta mieśje Šarl. Tak što ja vyrašyŭ nie mianiać proźvišča», — tłumačyć Itler.
Šarl Itler uznačalvaje na vybarach u Arsi-siur-Ob pravacentryscki śpis, a jaho apanient, 28‑hadovy Antuan Reno-Zialinski, pradstaŭlaje pravuju partyju «Patryjoty». Na parłamienckich vybarach u hetym rehijonie, za 150 km na paŭdniovy ŭschod ad Paryža, šmat hałasoŭ źbiraje pravapapulisckaje «Nacyjanalnaje abjadnańnie».
Adkul rodam Zialinski?
Antuan Reno-Zialinski, supracoŭnik mytni, pierajechaŭ u Arsi niadaŭna. Druhuju pałovu svajho proźvišča jon atrymaŭ u spadčynu ad polskaj mamy.
«Mianie časta pytajuć, ci nie svajak ja Zialenskamu, na što mnie davodzicca adkazvać, što nie», — raspaviadaŭ Zialinski telekanału BFMTV.
«Ja razumieju, čamu ludziam heta zdajecca śmiešnym. Mnie asabista heta nie śmiešna, ale i nie turbuje. Lepš by ludzi kazali pra Arsi pa inšych pryčynach, ale tak my choć by akazalisia «na karcie»», — skazaŭ kandydat u mery.
Cikava, što Arsi-siur-Ob niekatorym čynam źviazany z Ukrainaj.
U 1814 hodzie kala hetaha miastečka adbyłasia bitva pamiž armijaj Napaleona i armijami aŭstryjska-pruska-ruskaj kaalicyi. Francuzy prajhrali. Heta była pieradapošniaja vialikaja bitva Napaleona pierad adračeńniem i vysyłkaj na Elbu.
Praz dva hady niamieckija kałanisty, zaprošanyja rasijskim carom u Adeskuju vobłaść, nazvali ŭ honar bitvy pry Arsi-siur-Obie (Arcis-sur-Aube) svajo pasielišča ŭ Adeskaj vobłaści, na paŭdniovy zachad ad Adesy. Ciapier heta miastečka nazyvajecca Arcyz.
U Arsi-siur-Ob naradziŭsia znakamity palityčny dziejač časoŭ Francuzskaj revalucyi Žorž-Žak Danton.
Što tyčycca proźvišča nacysckaha fiurera, Hitler (Hitler), to jano i da Druhoj suśvietnaj było davoli redkim u niamieckamoŭnych krainach, a paśla vajny amal źnikła.
Kamientary