Padrabiaznaści dyviersii ŭ Čechii: padpaleny zavod vyrablaŭ ciepłavizary dla USU
Vialiki pažar u češskim horadzie Pardubicy paškodziŭ mahutnaści vytvorcy ŭkrainskich ciepłavizaraŭ Archer. Hałoŭnaj pryčynaj razhladajuć padpał.
Nočču 20 sakavika na vajskovym pradpryjemstvie ŭ Čechii zdaryŭsia pažar. Praź jaho premjer-ministr Andrej Babiš admianiŭ svoj vizit u Vienhryju i sklikaŭ pasiadžeńnie Rady dziaržaŭnaj biaśpieki.
Kiraŭnik ukrainskaj kampanii Archer Alaksandr Jaremienka zajaviŭ, što padpał byŭ ździejśnieny suprać jaho pradpryjemstva.
«Paviedamlaju, što nočču 20 sakavika naša pradpryjemstva ŭ Čechii «Archer-LPP» było metanakiravana padpalenaje hrupaj ludziej u maskach», — napisaŭ Jaremienka ŭ sacsietkach.
Pa jaho słovach, pažar achapiŭ składski cech i susiedni administracyjny budynak chołdynhu LPP. Abyšłosia biez paciarpiełych, ale kampanija paniesła značnuju materyjalnuju škodu.
Chołdynh LPP abjadnoŭvaje šerah technałahičnych kampanij, jakija zajmajucca raspracoŭkaj i intehracyjaj sistem u vajskovym i cyvilnym siektarach. A sama kampanija Archer, jakaja ŭvachodzić u skład chołdynhu, źjaŭlajecca viadomym vytvorcam vysokatechnałahičnaj optyki, u pryvatnaści ciepłavizijnych prycełaŭ i sistem nazirańnia, jakija aktyŭna vykarystoŭvajucca ŭkrainskimi vajskoŭcami na froncie.
Incydent 20 sakavika rasśledujecca češskimi dziaržaŭnymi słužbami jak terarystyčny akt. Adkaznaść za padpał uziała na siabie raniej nieviadomaja hrupoŭka The Earthquake Faction. Jana patłumačyła svaje dziejańni pratestam suprać vytvorčaści zbroi na hetym pradpryjemstvie, nibyta pryznačanaj dla Izraila.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary