U Vilni Koŭł pravioŭ sustreču i ź litoŭskimi apazicyjnymi palitykami

U hateli Kempinski ŭ Vilni ŭčora z pradstaŭnikom prezidenta Donalda Trampa sustrelisia deputaty Siejma Ihnas Viehiele i Rymas Jankunas, a taksama deputat Jeŭraparłamienta Piatras Hražulis, paviedamlaje LRT.

Jak viadoma, biełaruski bok akazvaje cisk na Litvu, zaklikajučy pačać dyjałoh ź Minskam na ŭzroŭni ministraŭ, adnak Litva admaŭlajecca heta rabić. Cisk prajaŭlajecca, u pryvatnaści, u adpraŭcy pavietranych šaroŭ z kantrabandaj praź miažu, jakija čas ad času parušajuć pracu Vilenskaha aeraporta, a taksama ŭ zatrymańni litoŭskich hruzavikoŭ i paŭpryčepaŭ.

«My damovilisia mocna nie afišavać hetuju sustreču, bo Alaksandr Łukašenka reahuje vielmi adčuvalna. My abmierkavali ŭsie najbolš aktualnyja siońnia prablemy — adnosiny ź Biełaruśsiu, admovu litoŭskaha boku sfarmiravać delehacyju i vieści pieramovy na palityčnym uzroŭni dla vyrašeńnia ŭsich pytańniaŭ. My ličym, što heta pamyłka i što razmaŭlać usio ž treba. Kali Donald Tramp viadzie pieramovy, telefanuje i šukaje kantakt, nam nie varta zanadta demanstravać svaju pryncypovaść», — skazaŭ P. Hražulis.

Pavodle jaho słoŭ, na sustrečy taksama abmiarkoŭvalisia pytańni kantrabandnych šaroŭ i zatrymanych hruzavikoŭ. «Nie chaču padrabiazna kamientavać, ale kali b my razmaŭlali, mahčyma, i hetyja fury ŭžo byli b vyzvalenyja. Heta maja vysnova», — zajaviŭ palityk.

Hražulis adznačyŭ, što najbolš aktyŭnym na sustrečy byŭ deputat Siejma Ihnas Viehiele, jaki padymaŭ bolšaść hetych pytańniaŭ. Pavodle jaho słoŭ, palityki pradstavili alternatyŭnuju pazicyju ŭ paraŭnańni z pazicyjaj litoŭskaha ŭrada.

«Naša pazicyja adroźnivajecca ad aficyjnaj. Ja dumaju, što amierykancy chočuć zrazumieć, čamu niama supracoŭnictva i pieramovaŭ, čamu nie stvarajecca palityčnaja hrupa dla dyjałohu. Alaksandr Łukašenka pryznačyŭ ministra zamiežnych spraŭ dla pieramovaŭ, ale litoŭski bok admoviŭsia. Mahčyma, amierykancy chočuć pačuć inšy punkt hledžańnia — čamu vy tak dumajecie i čamu adbyvajecca mienavita tak», — skazaŭ jeŭradeputat.

Pavodle słoŭ Hražulisa, na sustrečy taksama abmiarkoŭvalisia pytańni palihona ŭ Kapčamieścisie i sankcyj suprać uhnajeńniaŭ.

Jon adznačyŭ, što hetyja sankcyi, na jaho dumku, vyhadnyja Uładzimiru Pucinu i škodziać Litvie, pakolki ceny na ŭhnajeńni vyraśli, a rasijskaja kampanija «Urałkalij» pačała atrymlivać bolšy prybytak. Pavodle jaho słoŭ, udzielniki sustrečy vykłali pazicyju, jakaja adroźnivajecca ad toj, jakuju vykazvajuć prezident Litvy i ministr zamiežnych spraŭ.

Hražulis taksama zajaviŭ, što ŭ jaho skłałasia ŭražańnie, što zatrymanyja biełaruskimi ŭładami litoŭskija hruzaviki mohuć być vyzvalenyja.

Akramia taho, pavodle jaho słoŭ, Džon Koŭł vykazaŭ nadzieju addalić režym Łukašenki ad Uładzimira Pucina, choć pakul niezrazumieła, jak heta možna budzie zrabić.

«Ja nie viedaju, ale, vierahodna, hetyja fury buduć vyzvalenyja. Pahladzim, čym usio skončycca», — skazaŭ P. Hražulis.

Piatras Hražulis — heta niezaležny deputat Jeŭraparłamienta, jaki viadomy svajoj krytykaj homaseksualizmu, a taksama hučnaj apazicyjaj da ciapierašnich litoŭskich elit.

• 3
• 0
• 0
• 0
• 0
• 0
• 1
• 0