Prycisnuła, a prybiralni pobač niama? Raspracoŭščyk zrabiŭ telehram-bot z kartaj hramadskich prybiralniaŭ

«Adnojčy ja viartaŭsia ŭ Minsk z aŭtobusnaha tura ŭ Sankt-Pieciarburh. Było kala 7 ranicy, i paśla doŭhaj pajezdki biez prypynkaŭ mnie vielmi zachaciełasia ŭ prybiralniu. Na vakzale ja chutka znajšoŭ patrebnuju kropku ŭ Jandeks Kartach, ale na miescy vyśvietliłasia, što prybiralnia začyniena, — raskazvaje Jaŭhien.

— Tady ja padumaŭ: čamu da hetaha času niama prostaha i zručnaha servisu, jaki dapamahaje chutka znachodzić mienavita adkrytyja hramadskija prybiralni, a nie prosta kropki na karcie biez aktualnaj infarmacyi?

Vyrašyŭ dla siabie napisać telehram-bota, jaki šukaje publičnyja tualety.

Zapuskaješ bota i šukaješ prybiralniu

Ideja servisu maksimalna prostaja: dać čałavieku chutki i zrazumieły sposab znajści bližejšuju hramadskuju prybiralniu bieź lišnich dziejańniaŭ.

Dastatkova pierajści pa spasyłcy, adkryć Telegram-bota i adpravić hieałakacyju. Paśla hetaha bot adrazu pakaža śpis najbližejšych prybiralniaŭ. Zastajecca tolki vybrać padychodziačy varyjant i adkryć kartku z apisańniem i maršrutam u Jandieks Kartach, 2HIS, Google Maps abo Apple Maps.

Jak adpravić hieałakacyju ŭručnuju

• Pierachodzicie ŭ bot i naciskajecie knopku «Start». Dalej:
• Naciśnicie na značok saščepki ŭnizie źleva.
• Vybierycie raździeł «Hieapazicyja».
• Naciśnicie «Adpravić hieapazicyju».

Kali treba ŭkazać kankretnaje miesca, a nie biahučuju hieapazicyju, naciśnicie na značok pošuku ŭviersie sprava i ŭviadzicie patrebny adras, naprykład: Minsk.

Pavialičyć

Na dadzienym etapie bot dastupny tolki dla Minska. U dalejšym ja płanuju dadać padtrymku i inšych haradoŭ Biełarusi.

Navošta heta treba

Sama ideja nie ŭnikalnaja — padobnyja rašeńni ŭžo isnujuć u roznych krainach. Asabliva ich šmat u Japonii, dzie infrastruktury hramadskich prybiralniaŭ nadajecca vialikaja ŭvaha. Tam takija servisy mohuć pakazvać nie tolki raźmiaščeńnie prybiralniaŭ, ale i ich stan. Naprykład, uzrovień zaniataści abo čyścini kabinak.

Tak, prybiralni ŭžo paznačany na zvyčajnych kartach. Ale ŭ hetych prykładańniaŭ inšaja zadača: jany prosta pakazvajuć kropku na miascovaści. A ja chaču zrabić servis, dzie možna adlustravać toje, što sapraŭdy važna karystalniku: filtravać typy, čyściniu, dastupnaść dla ludziej ź invalidnaściu, najaŭnaść pielenalnaha stolika i inšyja paramietry.

U maim servisie takaja mahčymaść praduhledžana, ale pakul hety funkcyjanał jašče niedastupny dla karystalnikaŭ.

Taksama ja chaču, kab karystalniki mahli sami dadavać prybiralni ŭ servis. Pakul što ja stvaryŭ hrupu, kudy ludzi dasyłajuć patrebnyja kropki. Kali nabiarecca baza karystalnikaŭ, zrablu asobnaha bota. Tam možna budzie dadavać prybiralni i atrymlivać za heta ŭznaharodu».

• 1
• 0
• 0
• 1
• 0
• 0
• 0
• 0