Kievin Spejsi znoŭ paźbieh suda pa abvinavačvańni ŭ seksualizavanym hvałcie

Takim čynam, znakamitaść paźbiehnie sudovaha razboru pa novaj spravie, źviazanaj z seksualizavanym hvałtam, piša Bi-bi-si.

34‑hadovy akcior Ruary Kenan i jašče dvoje mužčyn, imiony jakich nie nazyvajucca, raniej padali hramadzianskija pazovy ŭ Vysoki sud Łondana. Jany śćviardžali, što Spejsi padvierh ich seksualizavanamu hvałtu ŭ pieryjad z 2000 pa 2015 hod.

66‑hadovy akcior adchiliŭ abvinavačvańni ŭ svoj adras.

Sudździa Kryścina Łambiert na słuchańni ŭ listapadzie pastanaviła, što spravy pavinny być papiarednie razhledžany ŭ kastryčniku hetaha hoda.

Adnak 13 sakavika sudovy razhlad byŭ prypynieny, pakolki bok «pahadziŭsia z umovami ŭrehulavańnia, vykładzienymi ŭ kanfidencyjnym hrafiku», havorycca ŭ pastanovie suda, jakuju 19 sakavika apublikavała ahienctva Press Association. Padrabiaznaści pahadnieńnia pamiž Spejsi i pazoŭnikami nie razhałošvajucca.

U čym pazoŭniki abvinavacili Spejsi?

Imia adnaho z pazoŭnikaŭ viadoma — heta 34‑hadovy akcior Ruary Kenan. U 2013 hodzie jon hraŭ u śpiektakli pa pjesie Teniesi Uiljamsa «Sałodkahałosaja ptuška junactva» ŭ łondanskim teatry «Ołd Vik», kali mastackim kiraŭnikom teatra byŭ Spejsi.

Pa słovach Kenana, Spejsi prystavaŭ da jaho na viečarynie paśla premjernaha pakazu śpiektakla.

Jašče adzin pazoŭnik, imia jakoha nie nazyvajecca, śćviardžaŭ, što Spejsi padviarhaŭ jaho hvałtu kala 12 razoŭ u pieryjad z 2000 pa 2005 hod.

Treci pazoŭnik, imia jakoha taksama nie nazyvajecca, kazaŭ, što paznajomiŭsia sa Spejsi na majstar-kłasie ŭ łondanskim teatry «Ołd Vik». Pavodle jaho słoŭ, nastupstvy pieražytaha ŭ 2008 hodzie seksualizavanaha hvałtu byli dla jaho ciažkimi: u jaho była dyjahnastavana psichičnaja traŭma, na lačeńnie jon byŭ vymušany patracić značnuju dla jaho sumu.

Na słuchańni ŭ siaredzinie sakavika advakaty pazoŭnikaŭ zajavili, što ŭ sudzie pavinny być zasłuchany pakazańni siami inšych śviedak nieprystojnych pavodzin Spejsi.

Na hetym słuchańni taksama stała viadoma, što Kenan dasiahnuŭ pahadnieńnia z teatram «Ołd Vik», mastackim kiraŭnikom jakoha Spejsi byŭ z 2004 pa 2015 hod.

Nivodnaha abvinavaŭčaha prysudu

U 2017 hodzie stała viadoma, što kiraŭnictva teatra «Ołd Vik» atrymała 20 skarhaŭ ad svaich dziejučych i byłych supracoŭnikaŭ na nieprystojnyja pavodziny Kievina Spejsi. Usie zajaŭniki byli mužčyny.

Suprać Spejsi za apošnija 10 hadoŭ było padadziena mnostva iskaŭ z abvinavačvańniami ŭ sieksualizavanym hvałcie i damahańniach, ale pakul akcior nie atrymaŭ nivodnaha abvinavaŭčaha prysudu.

U lipieni 2023 hoda prysiažnyja ŭ łondanskim sudzie pryznali Kievina Spejsi nievinavatym u seksualnych damahańniach. Sud apraŭdaŭ akciora pa dzieviaci punktach abvinavačańnia, jakija tyčylisia damahańniaŭ u adnosinach da čatyroch mužčyn.

Akcior śćviardžaŭ, što ŭsie dziejańni pamiž im i abvinavaŭcami ździajśnialisia pa ŭzajemnaj zhodzie, a hvałtu ŭ ich nie było.

Praces u Łondanie byŭ treciaj spravaj suprać Kievina Spejsi, jakaja dajšła da suda. Pieršyja dźvie jon taksama vyjhraŭ.

U kastryčniku 2022 hoda Kievin Spejsi taksama vyjhraŭ sud u Ńju-Jorku pa isku ab seksualnych damahańniach, padadzienym inšym akcioram Entani Repam.

Prysiažnyja pastanavili, što Rep nie zmoh dakazać svaje śćviardžeńni ab prystavańniach halivudskaj zorki.

Uletku 2019 hoda ŭ sudzie štata Masačusiets słuchałasia sprava ab seksualnych damahańniach akciora da 18‑hadovaha chłopca na vostravie Nantakiet u 2016 hodzie.

Małady čałaviek, jaki akazaŭsia synam viadomaj televiadučaj Chezier Anru, śćviardžaŭ, što Spejsi prystavaŭ da jaho ŭ restaranie, papiarednie napaiŭšy jaho.

Adnak sprava razvaliłasia, pakolki bok abarony dakazaŭ šmatlikija parušeńni, dapuščanyja bokam abvinavačańnia, až da padtasoŭki dokazaŭ.

U lipieni 2019 hoda prakuratura Masačusetsa źniała z akciora ŭsie abvinavačvańni.

Sam akcior śćviardžaje, što ŭsie abvinavačvańni ŭ jaho adras — heta ckavańnie, jakoje pačałosia ŭ 2017 hodzie i faktyčna pastaviła kryž na jaho paśpiachovaj karjery. Pry hetym jon nie tłumačyŭ, z čym, na jaho dumku, mahło być źviazana ckavańnie i chto moh być zacikaŭlenym bokam.

Kievin Spejsi — dvuchrazovy ŭładalnik premii «Oskar» za pracu ŭ karcinach «Pryhažość pa-amierykansku» i «Zvyčajnyja padazronyja». Jon zdymaŭsia ŭ takich filmach jak «Siem», «Sakrety Łos-Andželesa», «Mały na drajvie», a taksama ŭ sieryjale Netflix «Kartačny domik».

• 0
• 0
• 0
• 0
• 0
• 0
• 0
• 0